Kara Mehmed Paşa-zâde Mustafa Paşa, mansıbı olan Ohri'de fevt ve zâyik-ı merâret-i mevt oldu. Müşârun ileyh Mîrahûr-i Evvel iken, muktezây-ı vakt ile Vezîr ve İran'a Sefîr olmuşidi. 'Avdetinde Muhâfız-ı Belgrad ve bir müddetden sonra Deryâ Kapudanlığı'yle dil-şâd olup, ʿazli iktizâ ve taşra mansıblarında lâzime-i Vezâret'i icrâ ve mükerreren Kapudân-ı deryâ olup, baʿde-bürhetin mine'l-eyyâm maʿzûl ve eyâlât ü elviyeye tasarruf ile tavr-ı hükûmeti makbûl olmuşidi. Tekādüm-i zemân ile pîr ü nâtüvân ve rükûb u nüzûlden ʿaczi nümâyân olduğundan, Ohri Sancağı'yla kesb-i râhat ve sinni yetmişe yetmiş iken ʿazm-i sefer-i âhiret eyledi. Müşârun ileyh vüzerây-ı ʿizâmın yekke-süvâr-ı meydân-ı fürûsiyyeti ve idâre-i umûr ve ıslâh-ı hâl-i cumhûrda sâhib-i kudreti olup, hüsn-i hatt u hüner ile meşhûr ve ʿifây-ı hakk-ı Vezâret'de merd-i sâbit-kadem ü gayûr idi.