Hüdâvendigâr-ı sâbık cennet-mekân Sultân Ahmed Hân hazretlerinin benât-ı ʿismet-simâtlarından Zübeyde Sultân, bir müddetden berü ser-nihâde-i bâlîn-i bîmârî ve ramazân-ı şerîfin altıncı günü kudûm-i ecel-i mahtûm ile reh-peymây-ı dârü'l-ʿafv-i cenâb-ı Kird-gârî olup, gasl ü tekfîn ve nemâz ü telkīn ʿakabinde Vâlide Câmiʿi hâricinde defn olunan vâlide-i müşfikaları Musliha Kadın cenbinde mütevârî-yi zîr ü zemîn kılındı. Müşârun ileyhâ hayrât ü hasenâta mâyil ve fukarâ vü zuʿâfâya lütf u ihsânı şâmil âlât-ı sâz ve âvâze-i dil-nüvâzdan dâmen-keş-i ictinâb ve leyl ü nehâr mütâlaʿa-i kütüb ile merzât-i Hüdâ'yı iktisâb eyler idi. Civârında temekkün eden eytâm ü erâmil ramazânda zehâyir ve ʿîd mevsimlerinde libâs-ı fâhir ile vâreste-i gavâyil idi; rahmetüllâhi ʿaleyhâ.