Defterdâr bulunan Halîmî Mustafa Efendi'nin fisk u fücûra inhimâkı ve emvâl-i mîrîyyeyi sarf ü istihlâki mücerrebât-ı umûrdan iken, bu defʿa dahi vaʿd-i nükūd ve bezl-i bûd u nebûd ile Defterdârlığı tahsîl etmişidi. Sekret-i gafletden rehyâb-ı ifâkat olmasına sedd-i sedîd-i hevâ vü heves mâniʿ u hâciz ve ıslâh-ı hâlinden hûş-mendân-ı devlet dermân-de ve ʿâciz olduklarından, işbu saferu'l-hayrın altıncı günü Defterdârlıktan ʿazl olunup, Üsküdar'da tevkīf ve esnâfa olan düyûn-ı kesîresi mâlını beyʿ ile bir mikdâr tahfîf olundukdan sonra Limni Cezîresi'ne nefy ü tasrîf olundu. Baş-muhâsebe Kîsedârı Ahmed Efendi, umûr-ı Defterî'ye vâkıf u âşinâ ve zâtında merkūz âsâr-ı sıdk u ihtidâ merâyây-ı kulûb-ı evliyâ-yı umûrda ʿan-asıl sûret-nümâ olduğuna binâʾen, yevm-i mezkûrda Baş-defterdârlık hilʿatini iktisâ eyledi. Teberdârân gürûhundan iken nâyil-i rütbe-i Hâcegānî olan Küçük Süleymân Efendi, târîh-i mezkûrda Masraf-ı Şehriyârî Kitâbeti ile vâlâ-kadr ve Sultân Mehmed Câmiʿi Kâtibi Hâşim ʿAlî Bey, Emîn-i Şehr olup, sâbıkā Çavuşbaşı Selîm Ağa, Ser-bevvâbîn-i Dergāh-ı ʿâlî'ye vekîl ve Râmî Paşa-zâde Mustafa Bey, Baş-muhâsebecilik ile müktesib-i câh-ı celîl oldu. Ehl-i sûk u esnâf ziyy ü libâsda müşâbih-i ekâbir ü eşrâf olup, emîr u fakīr ve kebîr u sagīrin fark u temyîzi müşkil ü müteʿassir ve her şahsı hadd ü rütbesine tenzîl, siyâset-i mülkiye müteferriʿâtından olduğu zâhir olmağla, fî-mâ-baʿd esnâf makūlesi kākum ve semmûr kürk ve ricâl ü kibâra mahsûs esvâb geymeyüp, geydikleri halde eşedd-i siyâsetle teʾdîb olunacağları bâbında tahvîf ü inzâr ve ol bâbda emr-i ʿâlî ısdâr olundu.