Vezîr-i müşârun ileyh tahilletü'l-kasem sûretinde Sadrıaʿzam olup, hattâ nasbı günü: “Hulle vâkīʿ oldu” kelâmını nâtıka-zîb-i mutâyebe eylediği meşhûrdur. Virdü'l-yevmî olan esmâ-i hüsnâ ʿadedince doksan dokuz gün Sadâret edüp, zilkaʿdenin on altıncı yevm-i ahad sâkit ʿani'l-mesned olup, Sakız Cezîresi'ne irsâl olundu. Yevm-i mezkûrda sâbıkā Silahdâr-ı Şehriyârî ve el-yevm rütbe-i Vezâret'le Tevkīʿî olan ʿAli Paşa Enderûn-i hümâyûn'a ihzâr olunup, yed-i emânetine mühr-i hümâyûn iʿtâ ve dûş-i istihkākına ferve-i Vekâlet-i kübrâ iksâ olundu. Kapuya gelüp erbâb-ı menâsıba ʿumûm hilʿatleri ilbâs ve her şahsı rütbesine göre dest-i nüvâzende-i istînâs eyledi.