Defterdar-ı sâbık Halîmî Mustafa Efendi bundan akdem Der-i devlet'den istiskāl ve Mîr-i mîrânlık ile Sayda Eyâleti'ne irsâl olunmuşidi. İnkılâb-ı devr-i Sadr ile ʿavdete tâlib, ve kulûb-i nâsı cihet-i maʿlûme ile câlib olup, Mîr-i mîrânlığı refʿ u ilgā ve Hâcegānlığı takrîr u ibkā ve Âsitâne'ye ʿavdetiyçün tarafına hitâben emr-i ʿâlî isrâ olundu. Beher sâl Haremeyn-i şerîfeyn fukārâsına irsâl oluna gelen Surre-i hümâyûn Bozefendi-zâde Râkım Efendi birâderi olup, Hâcegān-ı Dîvân-ı hümâyûn'dan Surre Emîni nasb olunan Feyzullâh Efendi'ye teslîm ve mûmâ ileyh dahi Üsküdar'a geçüp, pesmânde-i umûrunu tanzîm ve kāfile-i hâc ile ol savb-ı şeref-evbe sevk-i metâyây-ı taʿzîm eyledi.