Mûmâ ileyh şehr-i recebin yedinci günü makarr-ı hükûmeti olan Marʿaş'da hücûm-i hümûm ile hasta ve zücâc-ı mizâcı seng-i ecel ile şikeste olduğu haberi, Der-i devlet-medâr'a vâsıl ve ehibbâ vü asdikāsına hüzn ü elem hâsıl oldu. Mûmâ ileyh Koca Mustafa Paşa'da ʿâlem-i vücûda pâ-nihâde olup, Defterdar-ı sâbık Sa'dullâh Efendi'nin cenâh-ı himmetiyle pervâz ve zemânında Emânet-i Maʿden ve rütbe-i Hâcegānî ile kesb-i imtiyâz eyleyüp, inkılâbât-ı edvâr ile Sipâh ve Silahdâr kitâbetleri ve Mâliyye ve Tersâne ve Darphâne emânetleriyle nâmdâr ve bir aralık da Kethudây-ı Sadr-ı ʿâlî-mikdâr olmuşidi. Sadr-ı sâbıkın dâd ü sitedde mişvârı zâhir ve Kethudây-ı mûmâ ileyh bu pazarlıkda kāsır olduğundan mesnedinden tenzîl ve Marʿaş Beylerbeyiliği ile tekdîr ü tenkîl etmişidi. Bir müddet Marʿaş'da ikāmet ve târîh-i mezkûrda dâr-ı bekāya rihlet eyledi. Mûmâ ileyh sebhiyye-i behiyye ile maʿrûf ve salâh-ı hâl ve safvet-i bâl ile mevsuf, Mushaf-ı şerîf'den yevmiyye iki cüz tilâvetine Delâyilü'l-Hayrât kırâ'etine müdavim olup, kesret-i işgāl ve teşvîş-i ahvâl ile bir gün kırâ'etde kusûr ve ihmal etmediği menkūldur. [M1 54] Hattâ bu meşgale arasında cevdet-i hatta mâyil olup, ʿasrında olan hattâtlardan temeşşuk ve ekserine tefavvuk edüp, sâ'ir meʿârifde dahi kadr-i müşterek, hazz u nasîbi ve nevâyib-i rûzgârı tehammülde Sadr-ı rahîbi var idi.