Gümrükçü İshak Ağa'nın hisâbında halel ü dâd ve senedinde fesâd ü zelel mahsûs ve bu sebeble Baş-bâkī-kulu'na mahbûs olup, Rûznâmçe-i Evvel Behcet Efendi ve baʿzı küttâb hesâbına me'mûr ve ol bâbda emr-i ʿâlî şeref-sudûr oldu. Etıbbây-ı Hâssa'dan Çelebî Mustafa Efendi, öteden berü nabz-gîr-i etrâf ve dânây-ı mizâc-ı eşrâf olduğuna binâ'en, tertîb etdiği maʿcûn saʿy ü ʿamel-i muvâfik-ı tabîʿat-ı emel olup, işbu Cumâdelâhıre evâhırında dâhil-i silsile-i müderrisîn-i kirâm ve Riyâset-i etıbbâ ile terkîb-sâz-ı eczây-ı merâm olup, selefi Hayâtî-zâde Kethudâsı Saʿîd Efendi'nin Gelibolu'da ikāmeti irâde ve fi'l-hâl me'mûr olduğu mahalle firistâde olundu. Mahdûm-i Sadr-ı seniyyü'l-menâkıb Mîr Mehmed Gâlib, Küçük Mîrahûrluk ile ihrâz-ı ehass-ı metâlib eyleyüp, Abaza Mehmed Ağa dahi Türkmân Ağalığı'yla bekâm ve sâbıkā Kethudâ Kâtibi Kayseriyyeli ʿAli Efendi bu defʿa dahi kitâbet-i mezkûrede istihdâm olundu.