Fırkate [M1 48] Kapudanlarından Kızıl-hisârî Caʿfer Bey, kendi mâlından bir kıtʿa sefîne inşâ ve iki yüz yetmiş kadar merd-i tüvânâ derûnuna teşhîn ü imlâ ile deryâya çıkup, iʿlâ’-i kelime-i Mevlâ eder idi. Şehr-i rebîʿulâhır evâsıtında deryâda geşt ü güzâr eyler iken, Malta'nın üç kıtʿa sefâyinine râst gelüp, tarafeynden muhârebe vü mudârebeye ibtidâr ve ceyş-i İslâm kemâl-i ikdâm izhâriyle mazhar-ı nusrat-i cenâb-ı Perverdi-gâr olup, düşmen gemilerinin birini sûzân ve diğeri girîzân ve birini ahz ü zabt ve Âsitâne-i saʿâdet'e getürüp, mersây-ı Tersâne'ye rabt eylediği maʿlûm-i hümâyûn olmağla, ahz eylediği korsan sefînesiyle Sinân Paşa Kasrı pîşgâhına getürdilüp, igtinâm etdiği sefîne takımıyla kendüye inʿâm ve sâlyâne-i kadîmine zamm ü terakkī ile ikrâm olunduğundan başka, neferâtıyla iktisâm etmek üzere vâfir altûn ihsân ve dâʿiye-i şevk u himmeti sad-çendân kılındı.