Şâm Eyâleti, Emâret-i Hâc inzımâmıyle mutasarrıfı Vezîr Esʿad Paşa'ya ve Sayda Eyâleti, birâderi Mîr-i mîrân Mustafa Paşa'ya; rebîʿulâhırın dokuzuncu günü ibkā vü takrîr ve Cumâdelâhıre'nin on sekizinci târihiyle Trablusşam Eyâleti ve Cerde Başbuğluğu menşûru, mutasarrıfı Vezîr Saʿdeddin Paşa ismine tahrîr olunup, Cidde Sancağı, mutasarrıfı Sadr-ı esbak es-Seyyid Mehmed Paşa'ya ve Mısr-ı Kāhire, Vezîr Silahdâr Mustafa Paşa'ya ve Avlonya Sancağı, mutasarrıfı Vezîr İsmâʿîl Paşa'ya; tevârîh-i muhtelifye ile kezâlik ibkā ve hayal-hâne-i hâtırlarında zebâne-keş-i iştiʿâl olan âteş-i inʿizâl itfâ olundu. Mekke-i mükerreme ve sâ'ir menâsıb-ı ʿilmiyyenin vakt-i tevcîhleri idrâk etdiğine binâ'en şehr-i rebîʿulâhırın beşinci günü Mekke-i mükerreme Kazâsı'yla, sâbıkā Edirne Kadısı Mehmed Rüşdi Efendi şeref-yâb ve Medîne-i münevvere Kadılığı ile Şâm Kadısı ʿÎsâ-zâde ʿAbdullah Efendi vâlâ-cenâb olup, Edirne Kazâsı'yla, bâ-Pâye-i Kudüs Âmid'den munfasıl olan Damâd-zâde Murâd Efendi ber-murâd ve Yenişehir-i Fenâr Kazâsı'yla, Kethudâ-zâde Mehmed Saʿîd Efendi âteş-zen-i kulûb-i hüssâd oldu. Yine târîh-i mezkûrda Âmid Kazâsı, Bukāʿî-zâde Ahmed Efendi'ye himmet ve Filibe Kazâsı, Galata Pâyesi olan üstâd-ı zemân Torun Mehmed Efendi'ye ʿinâyet olundu.