Mûmâ ileyh birkaç günden berü derd-i cângâh-ı maraz ile mübtelây-ı enîn ü âh ve ʿâkıbet mütevârî-yi hâk-i siyah oldu. Mûmâ ileyh Koca Mustafa Paşa'da sâkin Solakbaşı'nın oğlu olup, fark-ı cevâhir ü aʿrâz ve temyîz-i sevâd ü beyaz eyledikde, edeb ü meʿârife verziş ve kesb-i kemâlâta gûşiş edüp, cüz'iyyât-ı ʿulûmu Müneccim Halîl Efendi'den tahsîl ve sanʿat-ı kitâbeti muʿâsırlarından ahz ü tekmîl etdikden sonra, dokuz sene kadar Boğdan'da Kâtib-i Dîvân ve nâ'il-i servet ü sâmân olup, istîfây-ı hevâ vü heves ile Âsitâne'ye iyâb ve İbrâhîm Paşa devrinde Re'îsülküttâb olan Üçanbarlı Mehmed Efendi'ye intisâb ve bundan sonra Nuh Efendi'ye kesb-i teʿalluk ve himmetiyle zümre-i hâcegânâ telâhuk edüp, Tavukçu-başı dâmâdı el-Hâc Mustafa Efendi mesned-i Riyâset'e zînet-bahş oldukda, sâhib-i tercemenin kemâlâtını tahkīk ve umûr-i mühimmede istihdâm ile râbıta-i iʿtibârını tevsîk etmişidi. Sâhib-i Târîh Râşid Efendi, İran-zemîne Sefîr oldukda, mûmâ ileyhin hem-ʿinân-ı murâfakat olmasını recâ ve bu hidmeti dahi edâ edüp, ʿavdetinde huzûr-i hümâyûnda ilbâs-ı hilʿat ve Anadolu Muhâsebeciliği ile hakkında icrây-ı şîme-i mürüvvet kılınup, bundan sonra Şehremâneti ile kâm-yâb ve çok geçmeden Kethudây-ı Sadr-ı vâlâ-cenâb olmuşidi. Devetdâr Mehmed Paşa Sadâret'den maʿzûl ve yerine Mustafa Paşa mevsûl oldukda, kemâ fi'l-evvel makāmıyla mübeccel ve müddet-i kalîleden sonra maʿzûl [M1 49] ve Edirne'ye nefy ile menkûb u mahzûl olup, Edirne'de olan rızk-ı maksûmunu tekmîl ve ʿâfv ü ıtlâk ile veche-i ʿazîmeti Âsitâne'ye tahvîl ve kethudâlığında iştirâ etdiği Siyavuş Paşa Sarayı'na gelüp, kesb-i râhat etmeden işbu rebîʿulâhır evâsıtında garîm-i ecel yedinde zebûn ve zâyik-ı şerbet-i raybe'l-menûn oldu. Mûmâ ileyh Şârih-i Mesnevî Sarı ʿAbdullah Efendi merhûmun akribâsından olup, müşârun ileyhe sûrî ve maʿnevî nisbeti ve meşâyih-i Bayrâmiyye'den inâbeti olup, vaktinde olan ricâl-i Devletin ser-âmedî ve nahl-i kemâlât ve meʿârifin berûmendi idi.