Ağa-babası-zâde İbrâhîm Ağa dâ'ire-i hümâyûna intisâbı sebebi ile mehd-i ʿulyâ hazretlerine Kethudâ nasb olunup, Ayasofya Tevliyyeti ve Küçük Mîrahûrluk hıdmeti dahi dûş-i sadâkatine tahmîl ve Mîrahûr-i Sânî Yedekçi Mustafa Ağa'nın mutasarrıf olduğu mukātaʿa reʿâyâsı, zulm ü gadrini tafsîl eylediklerine binâ'en, bi-tarîkı'n-nefy Edirne'ye tesbîl olundu. Cânibî dâmâdı Ahmed Efendi, Masraf-ı Şehriyârî Kitâbeti ile dil-sîr-i niʿmet-i rağbet ve teberdârlardan İbrâhîm Efendi, Dâru's-saʿâde Ağası Kitâbeti ile lâbis-i hilʿat ve selefi mukātaʿa-i Haremeyn ile nâyil-i re'sü'l-mâl [ile] tesliyyet oldu. İmâm-ı Evvel-i Sultânî maʿzûl ve İzmir Mevleviyyeti ile nâyil-i eʿazz-i meʾmûl olup, Sânîsi, Evvel ve Ağa Câmiʿi İmamı, İmâmet-i Sâniye ile mübeccel olup, baʿzı musâhib ve bî-zebân ve sâzende ve hânendegân teceddüd-i nevbet-i saltanat sebebi ile dâ'ire-i hümâyûndan istiskāl ve baʿzısı hânesinde ve baʿzısı Serây-ı ʿatîk'de ikāmet etmek bâbında ısdâr-ı misâl olunup, musâhiblerin baʿzısı dahi kifâyet mikdârı meʿâş havâlesiyle cânib-i Mısır'a irsâl olundu. Reʿâyâ ve ehl-i zimmet bir zemândan berü tecavüz-i had ile elbiselerine zînet verdikleri ve İslâm'a mahsûs siyâb ile bî-edebâne hareket eyledikleri maʿlûm olup, tâyife-i mesfûreye tavr-ı kadîmleri üzere taʿyîn-i siyâb ve mürtedi olmayanları müstehakk-ı darbu'r-rikāb olmak evâmiri, lâzım gelenlere tenbîh ü işrâb olundu. Baş-bâkīkulu olan Mollacık-zâde ʿAli Ağa maʿzûl ve Sayda Vâlîsi'ni Kayseriyye'ye getürmek ve o havâlîde müctemiʿ olan mâl-ı mîrîyi tahsîl etmek meʾmûriyyeti ile ʿâzim olup, mansıbına ʿİvaz Paşa-zâde ʿAli Bey menkül oldu. Matbah-ı ʿÂmire Emîni Kesriyeli Kethudâsı Mehmed Efendi dahi makāmından dûr ve Sadr-ı esbak ʿAbdullah Paşa dâmâdı Mustafa Bey, Matbah Emâneti ile mesrûr oldu.