Bir müddetden berü Şeyhulislâm ve Müftiyyü'l-enâm olan Murtezâ Efendi, haddi zâtında perhîz-kâr ve ʿafîf ve ʿarîku'l-asl ve şerîf ise dahi galebe-i ʿillet ile mehzûl ü zaʿîf olup, resm günlerinde huzûru müteʿassir ve bu cihetle ʿazli zamîr-i Enver-i Şehriyârî'de müstetir olmuşidi. Şehr-i rebîʿulevvelin yirmi sekizinci günü müşârun ileyh câh-ı vâlâ-yı Meşîhat'den tenzîl ve sâbıkā Rumeli Kadıʿaskeri olup, ʿulûm-i şettâda mehâreti ve meʿârif ü dânişde şöhreti olan Vassâf ʿAbdullah Efendi mesned-i vâlâ-yı İftâ ile tebcîl olunup, selefleri Murtezâ Efendi bâ-irâde-i seniyye sâhil-hânelerine munsarif ve zâviye-i ʿibâdet ü tâʿatde muʿtekif oldu.