Selâtîn-i mâzıyye enârallâhü berâhînehüm hazerâtı taraflarından ʿakīb-i cülûs-i meymenet-me'nûsda düvel-i Nasârâ'ya irsâl-i süferâ kānûn olduğuna binâ’en, taraf-ı hümâyûndan bu ʿâdet ilgā olunmayup, ricâl-i devletden birer kimsenin taʿyîni irâde olunmuşidi. Binâ’en ʿalâ zâlik mâh-ı rebîʿulevvelin onuncu günü Dergāh-ı ʿâlî Kapucu-başılarından sâbıkā Baş-bâkīkulu Ziştovili ʿAli Ağa, Leh cânibine ve ʿİzzet ʿAli Paşa Mühürdâr-ı sâbık Silahdâr Kâtibi Dervîş Efendi, Moskov tarafına ve sâbıkā Küçük Tezkireci Halîl Efendi Nemçe Çâsârı'na tasmîm ve tahmîn ve levâzım ü harc-ı râhları mîrî tarafından taʿyîn olunup, bir ân akdem me'mûr oldukları tarafa hareketleri tavsiye vü telkin olundu.