Selâtîn ü mülûk-i selef hazret-i Hâlid'de taklîd-i seyf ile kesb-i şeref ede-geldikleri kānûn olduğuna binâ'en, şehr-i rebîʿulevvelin yedinci günü alay tertîb olunup, Sadriaʿzam ve Kapudan Paşa ve sudûr-i ʿulemâ ve mevâlî ve hâcegân ve müderrisîn ve ocağlu cümle esbâb-ı dîvâniyyeleriyle Serây-ı hümâyûn'da hâzır ve Şeyhulislâm Efendi'ye ʿaraba ile mukaddemce hazret-i Hâlid'e varup, kudûm-i hazret-i Şehriyârî'ye nâzır olmak ruhsatı müteyesser olup, alay âmâde olduğu taraf-ı Tâcdârî'ye ihbâr ve fi'l-hâl Şehriyâr-ı vâlâ-tebâr bir esb-i sabâ-reftâra süvâr olup, ilerüden erbâb-ı alay âheste seyr ü hareket ile ʿalâ tefâvüt-i merâtibihim ʿazîmete ibtidâr ve Ebu'l-Feth Sultan Mehmed Hân Câmiʿi'ne duhûl ve rahş-ı dil-keşlerinden nüzûl ve cedd-i aʿzamları türbesini ziyâret ile kesb-i feyz-i rûhâniyyet ve Hudâvendigār-ı merhûmun hatt-ı yedleriyle nüvişte olan mushaf-ı şerîfi görüp: “Bundan aʿlâ ziyâret olmaz” nutkuyla zikr olunan Mushaf-ı şerîfden bir ʿaşır Kur'an okunmasını fermân ve sevâbiyle revân-ı sâhib-i hattı şâdân buyurdukdan sonra, tekrâr süvâr-ı semend-i şevket ve türbe-i hazret-i Hâlid'e gelüp, kesb-i yümn ü bereket ve Nakību'l-eşrâf Rızâ Efendi dest-güşâ-yı duʿâ ve deymûmiyyet-i saltanat-ı seniyye temennâsını edâ edüp, duʿâya gāyet ve resme nihâyet verildikden sonra taklîd-i seyf maslahatına mübâşeret ve ol dahi vech-i maʿlûm ile pezîrrufte-i temşiyet olup, Hudâvend-i kerrûbî evsâf alay erbâbına ruhsat-dâde-i ʿavd ü insırâf olup, o hilâlde zevrak-i hilâl-revnaka süvâr ve ʿâzim-i dâr-ı şevket-medâr oldular.