Cülûs-i meymenet-me'nûsun üçüncü günü Sadr-ı vâlâ-makām ve Şeyhulislâm hazerâtı huzûr-i hümâyûna daʿvet olunup, müceddeden hakk olunan mühr-i şerîf-i Sultânî, Sadr-ı ʿâlî-kadrin müfevvaz-ı dest-i sadâkati ve zimâm-ı tesviye-i umûr-i ʿibâd, müsellem-i yed-i kifâyeti kılınup, serâ-sere dûhte bir sevb-i semmûr ile kāmet-i istiklâli tezyîn ve Şeyhulislâm Efendi'ye dahi beyâza kablu bir sevb-i semmûr kürk ilbâs olunup, hıdmet-i iftâya taʿyîn ve ihrâz-ı mevâhib-i Hâkān-ı cedîd ile ikisi dahi ʿîd ber bâlây-ı ʿîd edüp, Sadrıaʿzam Bâb-ı ʿâlî'ye ʿavdet ve ʿumûmen erbâb-ı menâsıba ilbâs-i hilʿat eyledi.