Âsitâne-i saʿâdet'de baʿzı kibâr mücerred terbiye ve iktisâb-ı meʿârif içün eflâz-ı ekbâdları olan evlâdlarını hezâr niyâz ile Galata Serâyı'na çırâğ etdirdüp, leyl ü nehâr muhâfazadan ve hâllerini mülâhazadan sâlim olup, meʿârifden behre-yâb olanları sevk-i kader ile Serây-ı cedîd'e alınup, fi'l-hakīka ekserî derece-i istiʿdâdlarına göre feyz-yâb ve gûnâ-gûn nân-pâre ile ilâ âhıri'l-ʿömr vâreste-i kayd-ı ihtiyâç ü ıztırâb olurlar idi. Ancak fakīru'l-hâl olanları tahsîl-i kitâba kādir olamayup, kitâbet ve kırâ'etde zahmet-keş ve kayd-ı istiʿâre-i kütüb ile hâli müşevveş olup, “âlât gerek etmeğe [M1 35] tahsîl-i kemâlât” vefkınca istiʿdâdı var ise dahi fikdân-ı âlet ʿadem-i vusûl-i matlaba ʿillet olduğunu Pâdişâh-ı ʿUtârid-fitnat nûr-i kerâmetle teferrüs edüp, Serây-ı mezkûrda bir kitâbhâne ve dershâne binâsını fermân buyurup, büyük oda mukābilinde bir mahall-ı münâsib tahsîs ve esâsı tarsîs olunup, üç mâh zarfında itmâma karîn ve irvây-ı ʿattâş içün yemîn ve yesârında iki ʿaded çeşmesâr yapılup, dershâneye müderris taʿyîn ve talebe-i ʿulûmun esbâb-ı tahsîlleri teshîl ü tehvîn ve fi'l-hakīka bir eser-i cemîl olup, Hâkān-ı zemânın defter-i hasenât ve cerâyidi aʿmâllerine serlevha ve ʿunvân olsa şâyândır.