Sâl-i sâlifde taraf-ı Sadâret-penâhî'den daʿvet ve âsâr-ı Mülûkâne'den Dolmabağçe Kasrı'nda tertîb-i ziyâfet olunduğu gibi bu sene-i ʿamîmetü'l-meymenede dahi o mahall-i bî-bedel ziyâfet-gâh olmağa lâyık ve mahal görülüp, Şehriyâr-ı bende-nüvâz Sadrıaʿzamlarını mest-i rahîk-ı beşâşet ü ihtizâz etmek kasdıyle, daʿvetlerine icâbet ve şevvâlin on birinci günü zikr olunan nüzhetgâhı kudûm-i feyz-lüzûmlarıyle reşk-endâz-ı sahn-ı cennet eylediler. Sadrıaʿzam icrây-ı resm-i ʿubûdiyyet ve zîr-i pây-i semend-i Mülûkâne'ye vazʿ-ı cebîn-i rukiyyet edüp, taraf-ı hümâyûndan iltifâta mazhar ve ser-i iftihârı küngüre-i mele'-i aʿlâya beraber olup, Pâdişâh Mahmûdü'l-hısâl zikr olunan kasra sâye-endâz-ı iclâl oldukları hâlde, râmiş-gerân-ı hoş elhân velvele-endâz-ı eyvân-ı keyvân ve savt-ı evtâr-ı sâzende-gân rûh-bahş-ı ebdân-ı insân olup, sâz u âvâzdan istîfây-ı haz olunduğuna binâ'en sâ'ir bâzende-gâna ruhsat ve anlar dahi icrây-ı sanʿat etdikden sonra tertîb-i taʿâm ve bu hidmet dahi itmâm olundukda, taraf-ı Sadâret-penâhî'den müzeyyen birkaç re's esb-i pîl-peyker ve birkaç boğça akmişe-i zer-ender- zer ʿarz-ı huzûr-ı Şehriyâr-ı cemîlü'l-eser kılınup, hediyyesi şâyân-ı nazar ve takdîmesi nezd-i Hüsrevâne'de muʿteber olup, ferve-i semmûr ve iltifât nâ-mahsûr ile Sadru's-sudûrunu ferhân ve Sâhil-serây-ı Beşktâş'a ʿatf-ı ʿinân eylediler.