Sadr-ı Rûm olan Ser-etibbâ-yı Hâssa Mehmed Efendi ve Sadr-ı Anadolu olan Lütfullah Efendi, işbu şaʿbânul-muʿazzamın yedinci günü müddet-i ʿörfiyyelerin tekmîl edüp, Rumeli'ye Dâmâd-zâde Feyzullah Efendi ber-vech-i tekerrür tesaddur ve Anadolu Sadâreti'yle mukaddemâ Anadolu Pâyesi olan Mehmed Sâlih Efendi, kesb-i istîbdâd ü teferrüd eyledi. Sâbıkā Anadolu Kadıʿaskeri ʿAbdurrahîm Efendi, hakkında âfitâb-ı ʿâlem-tâb-ı Tâcdârî lemʿa-rîz-i zuhûr ve şaʿbânın onuncu günü Rumeli Pâyesi'ne irtikā ile ser-kerem-i sülâfe-i sürûr olup, sâbıkā Selânik Kadısı ve Edirne Pâyesi olan İshak-zâde Yahyâ Efendi dahi merâhim ve işfâk-ı Sultân-âfâkdan hisse-mend ve Mekke-i mükerreme Pâyesi'yle Burusa hükümetine sevk-i semend eyledi.