Şehr-i recebü'l-ferdin dokuzuncu hamîs günü fukarâ-yı Haremeyn'e tertîb olunan Surre-i hümâyûn, Emîn nasb ve taʿyîn olunan Musâhib Sâlih Ağa'ya ber-vech-i muʿtâd teslîm olunup, Üsküdar'a ʿubûr ve birkaç gün zarfında tesviye-i umûr ve izhâr-ı sürûr ile kāfile-i hâccı istishâb ol savb-ı şeref-evbe şitâb eyledi. Donanma-yı hümâyûn'un Akdeniz'e doğru seyr ü hareketinin vakti tekarrub ve Kapudan Paşa dahi ʿazîmete te'ehhüb etmişidi. Şehr-i mezkûrun on ikinci günü müşârun ileyh mersây-ı Tersâne'den fekk-i lenger ve Yalı-köşkü'ne çıkup, muʿtâd üzere kürkünü ve Kapudanlar hilʿatlerini geyüp, Ak-deniz tarafına sefer eyledi. Eyyâm-ı behâr hulûl ve Istabl-ı ʿâmire'de olan huyûl-i sâfinâtın çerâ-gâh-ı hâssaya ihrâçları vakti duhûl eylediğine binâ'en, evâyil-i receb-i şerîfde muʿtâd olan alay ile atlar ihrâç ve mahallerine rabt ile bir müddet reh-yâb-ı ilcâm u isrâc olduğunun altıncı günü Mîrahûr-i Evvel Emîn Ağa-zâde Sâdık Ağa tarafından Şehriyâr-sütûde-haslet kemâl-i ibtihâl u darâ'atle da'vet ve lutfen da'vetine icâbet ve mîrahûrlara mensûb kasr-ı dil-nişîne sâye-endâz-ı şevket olmalarıyla istimâʿ-ı egānî ile kesb-i telezzüz-i rûhânî ʿakībinde ihzâr ü tehyi'e olunan etʿime-i şehiyye tenâvül olunup, taʿâm hıtâmında Ağa-yı mûmâ ileyh müzeyyen bir esb-i sabâ-reftâr keşîde-i sâha-i tezellül ü iftikār [M1 31] edüp, taraf-ı Mülûkâne'den kabûle karîn ve bir sevb-i semmûr ilbâsiyle hidmeti vâsıl-ı rütbe-i tahsîn olup, bundan sonra Şehriyâr-ı ʿatâ-pâş ʿâzim-i Sâhil-serây-ı Beşiktâş oldu.