İki buçuk seneden berü sâha-i Tersâne'de inşâsına sarf-ı nîrûy-i himmet kılınan üç anbarlı kalyon tekmîl ü âmâde olduğuna binâ'en, işbu recebü'l-ferdin dördüncü hamîs günü Şehriyâr-ı deryâ-nevâl Tersâne-i ʿâmire'ye teveccüh ve ikbâl buyurup, mukaddemce muntazar-ı kudûm-i şeref-lüzûmları olan Sadrıaʿzam ve Kapudan Paşa'yı iltifât-ı Şahâne'leriyle tatrîb ve anlar dahi kad-hamîde-i taʿzîm olarak zimnen icrây-ı resm-i terhîb etdikden sonra ʿAnkây-ı Bahrî nâm kalyonda ferş ü ihzâr olunan mahalle dek hidmet-i bagal-gîrî şerefiyle kesb-i iftihâr ve ʿavdet ve mahalli mahsûslarında karar etmişler idi. İhtiyâr olunan vakt-i mesʿûd hulûl ve ʿalâ mâ-cerâ'l- [M1 30] ʿâde tahsîl-i emr-i nüzûl ʿakībinde o cebel-i râsih ve o ʿilm-i bâzıha yol verilüp, fazl-ı Bârî ve himmet-i Tâcdârî'yle ber-vech-i sühûlet me'vâsı olan deryâya duhûl edüp, zihn-i Şâhâne'den sünûh eden nüvîd-i fütûh ile tesmiye ve zebh-i karâbîn ve ikdâr-ı fukarâ vü mesâkîn resm-i şükrânesi te'diye kılındıkdan sonra, Kapudan Paşa'ya ve Tersâne Emîni olan Bekir Efendi'ye ve sâ'ire muʿtâd üzere hilʿatler ilbâs olunup, bu aralıkda Tersâne Miʿmâr-başısı Sâlih Halîfe, oğlunun müderrisliği içün hâzır etdiği ʿarz-ı hâlini takdîm ve kalyon-i mezkûrun ibtidâ ve intihâsında dûçâr olduğu ıztırâbı girye-i gelû-sûz ile ʿarz u tefhîm edüp, niyâzı müsâʿade-i hümâyûna karîn ve oğlu mezkûr hatt-ı şerîf ile min ihde'l-müderrisîn olup, bundan sonra o Şehriyâr-ı Dâra gulâm filika-süvâr-ı ihtişâm olarak Serây-ı hümâyûnlarına hırâm buyurdular.