Şehr-i mezkûrun yirmi birinci günü Eyâlet-i Habeş ilhâkıyla Cidde Sancağı, Sadr-ı esbak Seyyid Mehmed Paşa'ya ve Karaman Eyâleti, Vezîr Mustafa Paşa'ya ibkā olunup, Özi Eyâleti Selânik Sancağı ilhâkıyla, sâbikā Bender Muhâfızı Vezîr İbrâhîm Paşa'ya ve Belgrad Muhâfızlığı, selefi Köprülü-zâde el-Hâc Ahmed Paşa'ya ve Selânik Sancağı, selefi Vezîr Nu'mân Paşa'ya ve Bender Muhâfızlığı, Mîr-i mîrân'dan Süsen- zâde ʿAbdullah Paşa'ya tevcîh olunup, şehr-i mezkûrun yirmi dördüncü günü tevâyif-i askerînin bir kıst mevâcibleri dahi tertîb olunan Dîvân-ı müşeyyedü'l-erkânda kabzına me'mûrlara taʿdâd ve iʿtâ ve dört gün sonra devr vâkiʿ olup, Rikâbdâr Ağa vesâtatıyle teşrîfât-ı mülâtefet-makrûn ve saʿy-i cemîl-i Sadâret-penâhîyi [M1 28] mutazammın hatt-ı hümâyûn şeref-vürûd olup, bu iltifât ü rağbet-i bî-intihâ kadr ü menzilet-i müşârun ileyhi iʿlâ eyledi.