Cumâdelûlânın dokuzuncu çehârşenbih gicesi Kandilli'de âteş-i serkeş-rû nümâ ve 'Ârifî dâmâdı Süleyman Efendi'nin Sâhil-hânesi hâriciyyesini ihrâk ile karîn-i intifâ olduğundan fazla, şehr-i mezkûrun on dördüncü Pazar gicesi Langa Yeni-kapusu kurbunda basmacılar kârhânesinden dahi âteş-i serkeş zebâne-keş olup, rûzgârın şiddeti hasebiyle etrâfa sirâyet ve der-sâ'at Şehriyâr-ı pür-şefekat ve Sadrıa'zam ve sâ'ir me'mûrlar yetüşüp, itfâsına himmet ve vâfir dekâkîn ve bin beş yüz kadar büyût-i Müslimîn ve re'âyâ hâneleri muhterîk olup, 'âleme dehşet gelmişiken, 'inâyet-i Mevlâ ile o beliyye-i 'uzmâ mündefi' ve havf-i sirâyet ile muzdarip olanlardan ihtilâc-ı derûn zâyil ü mürtefi' oldu. Şahsın biri hânesi cihân-nümâsından âteşi temâşâ eder iken âsumândan top dânesine müşâbih müdevverü'ş-şekl bir şey zuhûr ve basmacılar kârhânesine bir zirâ' kalarak tarrâka-i bülend ile çatlayup, eczâ' ve şerâresinin etrâf ü eknâfa intişârını re'ye'l-'ayn müşâhede eylediğini takrîr etmiş. Zikr olunan harîkda Berber Mustafa nâm kimesnenin hânesi vasatda vâki' olup, cevânibi tu'me-i ejder-i âteş olmuşiken, merkūmun hânesi âfet-i sirâyetden mahrûs ve bir mahalli rahne-dâr olmadığı mahsûs olup, lâ-te'sîre li'l-esbâb sırrı ma'lûm-i erbâbü'l-elbâb oldu.