Kibâr-ı hâcegândan Emîn-i Matbah-ı sâbık Halîl Efendi, dekkākatü'r-rikāb olan ʿillet-i şeyhûhat ile bir zemândan berü üftâde-i pîçiş-i ıztırâb iken, işbu cumâdelûlâ evâhirında dâr-ı fenâdan rihlet ve ʿazm-i cânib-i âhiret eyledi. Mûmâ ileyh Kayseriye'de mütevellid olup, Âsitâne-i saʿâdet'e vürûdunda zümre-i teberdârâna ittısâl ve bir takrîb Şehîd ʿAli Paşa'ya çatup, ihrâz-ı evvelîn-i pâye-i ikbâl etmişidi. Sevk-i tâziyâne-i himmet-i merhûm ile esb-i emeli tîz-rev ve katâr-ı hâcegâna iltihâk ile Emîn-i cev olup, baʿdehû Emânet-i Matbah-ı ʿÂmire ile tahsîl-i bülga-i iftihâr ve tenâvüb ü tekerrürden nâşî Matbah Emîni şöhretiyle nâm-dâr olup, giderek sâ'ir menâsıba dahi nâyil ve kesret-i hadem ü haşem ile müşârun bi'l-benân-ı emâsil olmuşidi. Ve eyyü naʿîmin lâ yükeddirühu'd-dehr mefhûmu üzere ikbâl ve tereffühüne isâbet-i ʿayn vâkiʿ olup, memleketine nefy ü iclâ ve müddet-i medîde ikāmetle tahkīr u izdirâ olunup, Sadr-ı esbak Hasan Paşa ile ülfeti ve hakkında sâbıka-i ʿinâyeti olmak takrîbi ile mûmâ ileyhi itlâk ve necm-i bahtını neyyir-i himmetiyle işrâk etmişidi. Bundan sonra Büyük Rûznâme ve Defter Emâneti ile imrâr-ı evkāt ve târîh-i mezkûrda vefât eyledi. Mûmâ ileyh muʿâsırı bulunan ricâl-i devletin nâmdârı ve bezl-i vücûd ve riʿâyet-i hukūk u ʿuhûd ile sâhib-i iştihârı olup, ʿulemâya muhibb ve meveddet-i ehl-i ʿirfâna mükibb olup, hânesi fî külli yevm velîme cemʿiyyeti gibi izdihâm üzere olup, sofra-i niʿmeti bây ü gedâya mebzûl ve kand-i mükerrer sohbetinden herkes mütelezziz olduğu menkūldür. Sinni-yi ʿömrü mi'e-i kâmileden zâ'id ve füshat-i ecel ile cihândan kâm almış bir pîr-i mâcid idi. Merhûmun hâcegândan Cebecîler Kitâbeti derecelerine vâsıl bir oğlu olup, merhûm Râ'if İsmâʿîl Paşa hemşîresini âverde-i hibâle-i izdivâc ile karîn-i ibtihâc olup, pederinin baʿzı mehâsinini tezkîr ve nâsdan celb-i rahmet ile kabrini tenvîr eyler idi. O dahi karîbü'l-ʿahdde fevt ve zebûn-i ser-pençe-i mevt oldu.