Mustağrak-i rahmet-i Rabbânî İbn Hacer Askalânî Buhârî-yi şerîf şerhi mukaddimesinde baʿde Kitâbillâh esahh-i kütüb olan kitâb-ı mezkûrun fezâyilini taʿdâd ve ezcümle mümkinât-ı umûrdan ne makūle emrin inkızâsı talep ve irtiyâd olunup, safvet-i kalb ve tahâret-i kâmile ile kırâ'et olunur ise husûl-i murâd mücerreb-i ashâb-ı iʿtikād olduğunu îrâd ve baʿzı ehl-i kulûb bu keyfiyyeti arz-ı huzûr-i Şehriyâr-ı vâlâ-nijâd etmişidi. Merâyâ-yı kulûb-i pâkîze-dilân kābil-i intibâʿ-ı suver-i maʿkūlât olduğundan bu kavl-i muʿteber tabʿ-ı Hüdâvendigârî'ye eser etmekle, memleket-i vesîʿu'l-ercâyı Devlet-i ʿaliyye'den şûriş ü inkılâbâtın defʿi ve sekene-i Âsitâne-i saʿâdet'e min ciheti'l-feyz ve'l-bereke fâyide vü nefʿi cezmiyle Hâkān-ı İskender-makām ʿale'd-devâm Buhârî-yi şerîf kırâ'et olunmasını iltizâm buyurup, hattâ Ayasofya'da vâkiʿ kitâbhâneleri kurbunda ʿale's-sabâh bir meclis-i hâfil inʿikādıyle kitâb-ı mezkûrdan yevmiyye birer cüz' kırâ'etini tertîb ve Buhârî-hânları vezâyif-i muʿayyene ve revâtib-i mukannene ile tatyîb buyurmuşlar idi. Bu eser-i pür-bereket Ebu'l-feth ve'l-megāzî Sultân Mehmed Hân Gāzî Câmi'-i şerîfine sirâyet ve o mahalde dahi Buhârî şerîf kırâ'et ve bu esnâda hatim du'âsı olduğunu rivâyet eylediklerine binâ'en, du'âda bulunmak ve feyz ü bereket-i hatm ile hisse-yâb olmak niyyet-i hâlisasıyla işbu cumâdelûlâ evâyilinde [M1 27] Hüsrev-i Dârâ-dürbet zikr olunan câmi'-i şerîfe 'azîmet ve salât-ı zuhru cemâ'atle edâdan sonra kārî Sahîh-i Buhârî hatim du'âsına mübâşeret edüp, o meclis-i 'amîmü'l-feyzden isticlâb-ı yümn ü bereket ve lâzım gelenlere bezl ü ihsân ve bahren Serây-ı 'âlîlerine tevcîh-i veche-i 'izz ü şân eylediler.