Mukaddemâ ihtirâʿ olunan tulumbalar kurb-i harîkde bulunan çeşmeler sebebi ile işe yarayup, çeşmelere baʿîd olan harîk lâ-mehâle arka ile ve bârgîr ile nakl-i mâya [M1 25] muhtâc ve su gelince vâfir mahal ihtirâkıyla kulûb-i nâsda iztirâb ve inziʿâc hâsıl olur idi. Bostâncılar Tulumbacı-başısı bu gāyileyi defʿ içün nev-îcâd bir tulumba peydâ ve mahall-i baʿîdden celb-i mâye hâcet mess etmeyeceğini ʿarz-ı hâliyle inhâ edüp, şöyle ki ekser büyûtta bi'r mevcûd olup, tulumbanın hortumunu bi're sarkıdup, itfây-ı harîka ibtidâr eyleyeceğini ve bi'r-i mezkûrda su kalmadığı hâlde âhar beyte varup, bi'rden yine fiʿl-i mezkûru icrâ edeceğini müdellel mukaddimât ile inhâ eyleyüp, sûret-i zâhirde nefʿ u fâ'idesi nümâyân olduğundan, zikr olunan nev-îcâd tulumbaların iʿmâline müsâʿade ve lâzım gelen mesârıfı cânib-i mîrîden verilmek irâde olunup, fi'l-hakīka baʿzı mahallerde zikr olunan tulumbaların itfây-ı harîka medârı olmağla, neşr ü istiʿmâli içün Tulumbacı Ocağı'na ve sâ'ir itfây-ı nâra me'mûr olanlara ısdâr-i misl-i lâzimü'l-imtisâl kılındı.