Bâlâda zikr olunduğu vech üzere Peri Kalası'nda mütehassın Zend Kerîm askeri, Âzâd Hân'ın muhâsara ve tazyikına tâkat getüremeyüp, sıyânet-i nefs ve mallarını takdîm ve istîmân ile kalʿayı teslîm [M1 24] eylediklerinde, Âzâd Hân kalʿa muhâfızı olan Şeyh ʿAlî Hân ile Mehmed Hân'ı iʿtikāl ve Kerîm Hân'ın ʿiyâl ve müteʿallikātlarıyla Rûmiyye Kalʿası'na irsâl ve muhâfazalariyçün beş altı yüz süvârî ve bir iki hân taʿyîn ve hazm ü ihtiyâta riʿâyet eylemelerini tenbîh ü telkin ve kendüsü dahi Isfahân'a ʿazîmet ve bilâ-müzâhim zabt-ı memleket etmişidi. Bu hâl ile me'mûr-ı muhâfaza olanlar Âzâd Hân'ın mülküne duhûl ve Afşâr toprağında Taş-keşân nâm mahalle vusûllerinde, müvekkillere emniyet hâsıl ve civârda vâkiʿ kurâya teferruk ile ʿîş ü ʿişrete müştağil olduklarından gayri askere baş ve Kızılbaş beyninde ʿAlem Hân ismiyle intiʿâş eden şahsın dahi çadırında mest-i mey-i nâb ve üftâde-i sadme-i hâb olduğunu mukayyed ve mağlûl olanlar ihsâs edüp, bir takrîb dest ü pâların kuyûd u iğlâlden tahlîs ve miyânelerinde ʿahd ü peymânı tersîs edüp, ʿAlem Hân'ın çadırına ʿazîmet ve merkūmu katl ve ellerine geçen ecnebîleri hân-ı maktûle vasl ile piyâdelerini atlandırup, karyelerde olanların baʿzısını tergîb ve baʿzısını terhîb ile cemʿiyyetlerine idrâc ve Hemedân'a rucûʿ ve etrafını taht ü târâc eylediklerinden gayri, Zend Kerîm hevâdârlarından ʿAlîmerdân Hân o havâlîye karîb bulunmağla, kazıyyeyi merkūma ihbâr ve istizhâr etmeleriyle, Hân-ı mezbûr dahi cemʿiyyete dâhil ve sevâd-ı cemʿiyyetleri beş altı bin piyâde ve süvârî derecelerine vâsıl olup, bu haber-i bârid Âzâd Hân'a vârid oldukda, altı yedi bin asker taʿyîn ve Yezdicerd'e yakīn mahalde hasmeyn birbirin görüp, ahadühümâ âhara havâle-i şemşîr-i hışm ü kîn etmeleriyle, Âzâd Hân askeri mağlûb ve müdemmir ve Zendîler nâyil-i fevz ü zafer olduklarından gayri, Âzâd Hân'ın askeri bunlar ile müttahid ve beraber olup, bu cihetle cemʿiyyetlerine kuvvet ü kesret ve hasımları tarafına zaʿf ü kıllet târî olup, el-yevm Âzâd Hân Isfahân'da ve Şeyh ʿAlîkulîhân Hemedân etrâfında ve Zend Kerîm Isfahân'a karîb mahalde asker cemʿiyle meşğûl olup, bundan sonra meşîme-i kazâ vü kaderden ne tevellüd edeceği ʿilm-i beşerden hâriç olduğu mukaddimâtını Bağdâd Vâlîsi bast u temhîd ve sâ'ir serhadlerden vürûd eden ahbâr dahi müşârun ileyhi tasdîk u teʼyîd eyledi.