Mesned-i Fetvâ'dan bilâ-sebeb tenzîl ve bir müddet Gelibolu'da ikāmet ile kuvây-ı râhat u huzûru taʿtîl olunan Şeyhulislâm-ı sâbık Esʿad Mehmed Efendi, tertîl-i âyet-i sabr-ı cemîl ile muntazır-ı tahliye-i sebîl olmuşidi. Hakkında ʿafv-i Şehinşâhî ser-zede-i zuhûr ve İncir Köyü'nde ikāmetiyçün hatt-ı hümâyûn şeref-sudûr olup, o ʿallâme-i kurûm-i Rûm Âsitâne-i saʿâdet'e kudûm edüp, birkaç mâhdan berü mizâcı münharif ve emâre-i mevt ʿayn-ı basîretine münkeşif olup, işbu Şevvâlü'l-mükerremin onuncu hamîs gicesi [M1 17] dâʿî-yi ecel ve vâsıl-ı rahmet-i Hakk-ı ʿazze ve cell oldu.