Müşârun ileyh esbağallâhu niʿamehü ʿaleyhi bin doksan altı zilkaʿdesinde Şeyhulislâm İsmâʿîl Efendi'nin sulbünden zîb-ârâ-yı şühûd ve pîrâye-bahş-ı gehvâre-i vücûd olup, ʿakl-ı heyûlânîden halâs ve ʿakl-ı bi'l-meleke rütbesiyle ihtisâs hengâmında peder-i vâlâ güherlerinden ve Mutavvelci Mehmed Efendi'den istifâde-i ʿulûm ve çok geçmeden tahkīk-i mantûk u mefhûm edüp, bin yüz yirmi iki târîhinde dürr-i semîn istiʿdâdı maʿlûm-i sayrefyân-ı esâtîn-i dîn olduğundan, Hâriç Rütbesi'yle dâhil-i dâyire-i müderrisîn olmuşidi. Vâlid-i mâcidleri Meşîhati'nde Sahn ile be-kâm ve hidmet-i teftîş ve Emânet-i Fetvâ ile memdûh-i hâss ü ʿâmm ve bundan sonra Selânik Mevleviyyeti ile hurrem ve çok geçmeden birâderleri İshak Efendi Meşîhati'nde Mekke Pâyesi'yle mükerrem olup, Ada-i Kebîr ve dârü'l-cihâd Belgrad seferlerinde Ordu Kadısı bulunup, te'sîr-i re'y-i münîriyle kat-ı çok mesâlih-i devlet karîn-i hüsn-i temşiyet ve niçe megālik-ı umûr küşâde-i dest-i ru'yeti olup, yüz elli yedi muharreminde bi'l-fiʿl Sadr-ı Rûm ve on yedi mâh kadar mutesaddî-yi hükûmet-i husûs u ʿumûm olup, elli dokuz senesi şevvâlinde o câh-ı refîʿ ile tekrâr ihrâz-ı dest-mâye-i rifʿat ve şehr-i recebde ʿazl ve sâhil-hânesinde ikāmet etmişidi. Altmış bir senesi recebinde Şeyhulislâm ve hallâl-i müşkilât-ı enâm oldu. Meşîhatine fühûl-i ʿulemâdan ʿÂsım Efendi bu gûne târîh inşâd etmişdir. Dedi ʿÂsım-ı kemîne şevk u şâdı birle târîhin Bu niçe câmedir Esʿad Efendi geydi fetvâyı بو نیچه جامه در اسعد افندی کیدی فتوایی Râgıp Mehmed Paşa mutasarrıf-ı Ümm-i dünyâ iken takdîm etdiği târîhdir: Câh-ı sâmî-yi rükn-i iftâ bâd-pâ Esʿad-ı saʿîd sene-i âtiye şaʿbânında zâyik-ı merâret-i ʿazl ü infisâl ve ber-vech-i muharrer Gelibolu'ya ve andan İncir Köyü'ne gelüp, civâr-ı rahmet-i Hakk'a intikāl eyledi. Müddet-i meşîhatları on üç mâhdır. Mezâr-ı pür-enverleri ittisâlinde peder-i emcedlerinin binâ etdikleri câmiʿ pîşgâhında olan medrese ve mekteb ve şâdırvân ve müteʿaddid dersiyyeler âsâr-ı hayriyyelerindendir. Müşârun ileyh fâzıl-ı yegâne ve müfred-i zemâne-i sânî-yi Taftazânî, belki muʿallim-i sânî, ʿulûm-i şettâda mehâreti zâhir ve fünûn-i edebiyyede rüsûh-i kalemi pesendîde-i evâyil ü evâhir olduğundan gayri fenn-i mûsikîde ʿadîl-i Fârâbî ve şiʿr u inşâda rağbet-şiken-âsâr-ı Veysî ve Nâbî olup, Lehce nâmında olan lügati, ittisâʿ-ı maʿlûmâtına dâl ve Sûre-i Yâsîn ve Âyete'l-kürsî ve âyâtü'l-l-musaddarati bi-Rabbenâ tefsîrleri vâreste-i kīl ü kāl-i ashâb-ı muʿâraza vü cidâl olduğundan [M1 18] başka, Cârullah Zemahşerî'nin Etvâkü'z-Zeheb fî'n-Nesâyih ve'l-Huteb ismiyle mevsûm olan kitâbını tanzîr ve İtbâku'z-Zeheb nâmiyle tesmiye eden ʿAbdu'l-mü'min İsfahânî mesleğinde bir eser-i belîğ te'lîf ve Bülbül-nâme ve Tezkire-i Hânendegân nâmında birer risâle tasnîf edüp, zâde-i tabʿ-ı latîfleri olan beste ve semâʿî ve kâr ve nakş tıbâʿ-ı kavâbile ferah-bahş olup, bundan başka Hemziyye ve Dimyâtiyye ve Mudariyye ve bir de kasîdeleri tahmîsi ve müşârun ileyhin müstakıllen Kasîde-i Hemziyye ve Kasîde-i Lâmiyyesi sencîde-i mîzân-ı kabûl-i erbâb-ı ʿirfân ve mergūb-i yeke-tâzân-ı meydân fazl ü îkāndır.