Yeniçerileri ağaları taraflarından Sadâret-i ʿuzmâ ve Vekâlet-i kübrâ ile mübeccel olanlara baʿde'l-ʿîd ziyâfet resm ü ʿâdet olduğuna binâ'en, işbu şevvâlin onuncu hamîs günü Ağa-kapusu'na müşârun ileyh daʿvet ve sâzende vü bâzende ile kesb-i ferah u behcet ve baʿde'l-ʿasr tenâvül-i taʿâm ve ʿavdet hengâmında Yeniçeri Ağası tarafından müzeyyen bir re's esb ve hedâyâ-yı sâ'ire keşîde-i sâha-i Sadr-ı vâlâ-makām kılınup, bu mukābelede Ağa-yı mûmâ ileyhe ilbâs-ı hilʿat ve Serây-ı Âsafâne'lerine ricʿat eylediler.