Sadr-ı aʿzam Mustafa Paşa ibtigāy-ı merzât-ı Hudâ zımnında bir câmiʿ ve fukarâ-yı Nakşibendiyye içün tekye binâsını kasd edüp, Hâşimî birâderi ʿAli Efendi'nin medîne-i Ebî Eyyûb Ensârî kurbunda vâkiʿ Otakçılar'da terk eylediği bağçesini iştirâ ve bin yüz altmış altı senesi cumâdelûlâsının yedinci günü hafr-i esâsa ibtidâ ve yüz yedi gün murûrunda emr-i binâ gāyete resâ olup, tekye meşîhati zuhru'l-vâsilîn Şeyh Murâd-zâde ʿAli Efendi'ye şart ve câmiʿ ve tekyeye kifâyet mikdârı evkāf rabt eylediklerinden gayri, nezâretlerinde ve âhar nezâretlerde vâkiʿ baʿzı mesâcid, harîkler takrîbi ile harâb ve mahallâtında vâkiʿ cemâʿat bu sebeble mübtelây-ı ıztırâb olmuşlar idi. Zikr olunan mesâcidin binâsı içün sarf-ı dînâr ve yevm-i karâr içün zuhr ü sevâb iddihâr eyledi.