Hicret-i Nebeviyye'nin yüzüncü senesi ʿalâ rivâyetin gümâştegân-ı Benî Ümeyye Galata'yı feth ve câmiʿ-i mezkûru binâ ve derûnunda ferâyiz-i hamseyi edâ ve surûf-i rûzgâr ile o mahall-i müteyemmen edevât ü âlâta mahzen olmuşidi. Altmış beş senesi şaʿbânında Şâm-ı şerîf'den Şeyh Murâd-zâde Şeyh Mehmed Efendi Âsitâne'de pederini ziyâret ve sıla-i rahim şerâyitine riʿâyet içün ibtidâ Üsküdar'da ve baʿdehû Galata'ya pâ-nihâde-i ʿizz ü temkîn ve makām-ı mezkûrun târîh-i mezkûrda câmiʿ olduğun keşf ü işâret ile taʿyîn edüp, taraf-ı saltanata binâsını tergîb ve fezâyilini tefrîʿ ve tebvîb edüp, işâretlerine mebnî mahall-i mezkûrun binâsına mübâşeret ve dokuz mâh murûrunda secde-gâh-ı ehl-i sünnet ve cemâʿat kılınup, vazʿ-ı kürsî vü minber ve taʿyîn-i evkāf-ı evfer ile Şehriyâr-ı İskender-fer tahsîl-i [M1 15] mesûbât ve kesb-i hasenât eylediler. İştigāl-i emr-i binâ hılâlinde baʿzı merâkid müşâhede ve Şeyh-i müşârun ileyh tahkīki ile baʿzı kibâr mezârı olduğu ifade olunup, fi'l-hâl vazʿ-ı sandûka ve ʿalâmet ve ziyâretgâh-ı erbâb-ı hâcet kılındı. Câmiʿ-i mezkûrun itmâmına Hâkim-i merhûmun söylediği târîhdir: Pâk ü zîbâ câmiʿ-i Sultân Mahmûdü'l-hısâl (باك و زيبا جامع سلطان محمود الخصال)