Dârü'l-cihâd olan Belgrad Vâlîsi Vezîr ʿAbdulganî Paşa bir müddet hummâya mübtelâ ve hulûl-i ecel-i mevʿûduyla reh-rev-i vâdî-yi bekā olup, münhal olan mansıbı, münâsebet-i civâriyyet ile Vidin Muhâfızı Vezîr Nuʿmân Paşa'ya ve Vidin muhâfazası Vezîr Yahyâ Paşa'ya ve Eğriboz Sancağı İnebahtı Muhâfızı Vezîr Mustafa Paşa'ya ve İnebahtı Mîr-i mîrândan Kaplan Paşa'ya şehr-i mezkûrun on yedinci günü tevcîh olunup, ol bâbda ısdâr-ı misâl ve mansıblarına ʿazîmetleri istiʿcâl olundu.