Mu'allem Asker Başbuğu olup, bundan akdem dağlu eşkıyâsı üzerine me'mûr olan Karaman Beylerbeyisi ʿAbdurrahmân Paşa vukūʿ bulan maʿrekede ibrâz-ı merdânegî vü celâdet eylediği tahrîr u işâret olunmuşidi. Paşa-yı mûmâ ileyh iʿmâl-i askere kādir ve zâtında cesûr u behâdır olmakdan nâşî, umûr-ı ʿizâm-ı devletde istihdâma şâyân olduğu tavr u hareketinden müstebân olmağla, hıtâm-ı me'mûriyyetiyle Âsitâne'ye ʿavdetinde mazhar-ı ʿâtıfet-i hazret-i Tâc-dârî ve işbu Cumâdelâhıre'nin yirmi yedinci günü Rütbe-i vâlâ-yı Vezâret'le pâ-nihâde-i süllem-i kâm-kârî olup, Âsitâne-i saʿâdet'den rişte-i ikāmeti tefkîk ve mansıbı olan Konya'ya râyet-i ʿazîmeti tahrîk eyledi.