Mâh-ı Cumâdelûlâ evâhırında Top-hâne'ye mülâsık çubukçu dükkânından sâʿat dört buçukda iken âteş-i ser-keş ʿalev-gîr ve Top-hâne kışlaklarını ihrâk ile baʿzı mahallere te'sîr ve ber-vech-i tahmîn dört yüz bâb hâne ve dükkân sûzân ve iki yüz bâb hâne münhedim-i tîşe-i zâbitân oldukdan sonra, bi'l-külliyye muntafî-yi fazl-ı Yezdân oldu. Bu ihrâka müteʿâkıb leylen sâʿat beşde iken Haskarye'de Büyük İskele civârında vâkiʿ boyacı dükkânından nâr-ı zâtü'd-dırâm mültehib olup, Âyîneli-kavak pîşgâhından “Sakālar Kapusu” nâm mahalle gelince ve andan humbaracılar kışlakları civârında tuğla harmenlerine müntehî olunca, tahmînen beş yüz hâne muhterik ve yüz elli kadar hâne hedmiyle ol dahi münhamid-i âbyârî-yi lutf-i Hâlık oldu.