Baʿde'l-feth Mısr-ı Kāhire'de temekkün ile envâʿ-ı şekāvete tesaddî eden İbrâhîm Bey ve Saçlı Osmân Bey gayret-i İlâhiyye zuhûruyla bi'l-muhârebe [V 139b] mağlûb u menkûb ve Mısır'dan ihrâc olundukları mukaddemâ nakş-ı sahîfe-i ʿibret-üslûb kılınmışidi. Merkūmlar İngiltere'den [Ü4 283b] ʿavdet eden Elfî Mehmed Bey ile ittihâd ve yek-dîger ile i'tizâd eyleyerek, Mısır'a duhûl kasdıyla evbâş-ı ‘Urbân'dan cemm-i gafîr istishâb ve Mısır'a doğru 'azm ü şitâb etmişler idi. İmâm Şâfi'î merkadına iki sâʿat mesâfeye dek vürûdları tehakkuk ve bir takımı dahi Mısır'ın öte tarafından gelüp, iki cânibden îrâs-ı hasr u tezâyuk eylediklerine binâ'en, Mısır Vâlîsi Vezîr Hurşîd Paşa, maʿiyyetinde mevcûd cünûd ile mukābele ve pey-der-pey idâre-i esbâb-ı mükâfeha vü mukātele eylediği bundan akdem müşârun ileyh tarafından tahrîr olunmuşidi. Ümerây-ı bed-kirdârın dâhil-i dâyire-i şekāvetleri olan erâzil ü eşhâsın şeb-hûn ile kârları itmâm olunmak tedbîri, ru'esây-ı asâkir-i Şâhâne miyânında karâr-gîr-i nizâm olduğuna binâ'en, fâtiha-i tebâşîr-i subh-ı zafer olan bir şeb-i bu'l-'acebde ber-minvâl-i muharrer eşkıyâ mazhar-ı nekâl-i şeb-hûn ve vâfiri masrûʿ-ı serpençe-i reybü'l-menûn olup, cemʿiyyetleri perâkendü vü perîşân ve karâr-gâhları sâhil-i Nîl olmak takrîbi ile vâfiri garîk-ı hülket ü husrân ve füshat-ı ecele makrûn olanları birer semte gürîzân oldukları haberi vürûdunda, Mısır'ın öte cânibinden tazyîka mübâderet eden eşkıyâ üzerine dahi leylen hücûm olunup, tâyife-i mezkûre dahi fazl-ı cenâb-ı Bârî ve yümn-i baht-ı hazret-i Tâc-dârî ile reh-rev-i vâdî-yi hezîmet ve ekseri müsta'sıl-ı seyf-i siyâset olmuşiken, [V 140a] sevdây-ı galebe ile tekrâr “Hânke” nâm mahalde kâr-bend-i ictimâʿ ve tertîb-sâz-ı hengâme-i ceng ü nizâʿ oldukları ihbâr ve müşârun ileyh [Ü4 284a] tarafından külliyyetlü asker techîziyle îkād-ı nevâyir-i kâr-zâr kılınup, bu defʿa dahi eşkıyâ vü bugāt mağlûb-ı kümât-ı nusrat-simât olmağla, me'yûs u nevmîd ʿâzim-i semt-i Saʿîd olduklarından nâşî, mukaddemâ kufl-i bend-i fesâdları olan tarîk-ı Süveys feth u küşâd ve Yenbûʿ İskelesi'ne zahîre ve asker îsâliyle Medîne-i münevvere'ye imdâd keyfiyyeti kesb-i istiʿdâd eylediğini, müşârun ileyh işbu Rebîʿulâhir'da Südde-i saʿâdet'e 'arz u ifade eyledi. Bu nevîd-i cedîd müşârun ileyh hakkında teʿayyün eden teveccüh ü iltifât-ı Şâhâne'yi te'kîd ve Mısr-ı Kāhire'de bir müddetden berü ceng ü cidâl münkatıʿ olmadığına binâ'en, mühimmâta nefâd târî olup, maslahat-ı Haremeyn'e sarf olunmak içün matlûbu olan mühimmât bu defʿa tarafına irsâl olunmakda istiʿcâl ve mukaddemâ Mîrâhûr-ı Sânî vesâtatıyla emr ü fermân olunan hutûb-ı cesîmenin temşiyyetine ez-dil ü cân saʿy ü himmet ve Mısr-ı Kāhire'den beş-altı yüz kadar askere bir kâr-güzâr sergerde nasbı ile Yenbûʿ İskelesi'nin eyâdî-yi Aʿrâb'dan nezʿ ü istihlâsına bezl-i cell-i miknet eylemek ve'l-hâsıl sükkân-ı belde-i Hayru'l-enâm ve cîrân-ı Beytullâhi'l-harâm muzâyaka-i Havâric'den min- külli'l-vücûh vikāye ile tevsîʿ-i dâyire-i maʿîşetlerine ihtimâm etmek maksad-ı aslî olmağla, bu umûr-ı lâzımu'l-iʿtinâya teferruʿ eden ahvâl ber-vech-i tafsîl tarafına tahrîr u beyân ve müceddeden ısdâr-ı evâmir-i ʿâlî-şân kılınmışidi. Müşârun ileyh bu bâbda terk-i hâb u râhat [V 140b] ve bu hatb-ı cesîmin ru’yet-i idâresi zımnında sarf-ı mâ-hasal-1 kudret eyleyüp, şöyle ki, bu tarafda ismi açık baʿs olunan [Ü4 284b] Mîr-i mîrânlık emr-i ʿâlî-şânını Mısır Subaşısı olup müşârun ileyhin emekdâr ve sadâkati mücerreb hıdmet-kârlarından ʿAli Ağa'nın ismine tashîh ve Mîr-i mîrânlığı'nı işâʿa vü tasrîh edüp, ebnây-ı Etrâk'den beş-altı yüz mikdârı piyâde ve süvârînin altı aylık ʿulûfeleri Mısır Hazînesi'nden edâ ve üç aylık zahîreleri bi-temâmihâ iʿtâ olunduğundan fazla, mükemmel takımlarıyla altı kıtʿa top ve bir kıtʿa hâven verilüp, işbu Cumâdelûlâ'nın yirminci günü Süveys cânibine tesyîr ve Yenbûʿ İskelesi'ne doğru tahrîk olundukları haberini müşârun ileyh tahrîr edüp, fîmâ-baʿd Haremeyn-i şerîfeyn gılâlının îsâline ve Cidde Vâlîsi'ne lâzım gelan iʿânetin hasbe'l-makdûr istikmâline teşmîr-i sâk-ı gayret eyleyeceğini ve Saʿîd cânibine firâr ile el-yevm o havâlîde istikrâr üzere olan ümerây-ı bed-kirdârın fazl-ı Bârî ile kahr u tenkîllerine bir tertîb-i cedîd tanzîm ü ihzâr ve karîben ihrâc ile bi'l-külliyye cemʿiyyetlerini târumâr etmek kasdında olup, bu niyyetin icrâsıyla tefrîk-ı şeml-i muhâlifîne muvaffak olduğu hâlde tarîk-ı Saʿîd küşâde ve bir müddetden berü Mısır'a müstevlî olan kaht u galâ izâle olunarak, hısb u rehâ fazl-ı Mevlâ ile fevka'l-ʿâde olacağını dahi beyân u ifâde eyledi. Müşârun ileyhin tavr u hareketinden mekāsıd-1 Devlet-i ebed-kıyâm, cilve-ger-i meclây-ı hüsn-i nizâm olmak emâreleri tebeyyün [V 141a] ve Yenbûʿ İskelesi'nin fethiyle bukʿateyn-i mübâreketeyn halkının kürbet-i tazyîk u inhisârdan vâreste olacağları teʿayyün eylediğine binâʾen, müşârun ileyh mazhar-ı [Ü4 285a] tahsîn ve bir kat dahi sezây-ı âferîn olduğundan fazla, müceddeden Mîr-i mîrânlık tevcîh olunan ʿAli Paşa'nın teʾyîd-i rütbesiyle dâʿiyye-i şevkı tehyîc ve sâyir ruʾesây-ı askerînin dahi bu bâbda tarh-ı perend-i zuhûr olan metâʿ-ı ikdâm u gayretleri, tamgāy-ı istihsân-ı Şâhâne ile tervîc olundu.