Âsitâne-i saʿâdet'de bir müddetden berü bast-ı kālîçe-i ârâm u râhat eden Vezîr ʿAlâʾeddîn Paşa, Anadolu Eyâleti'nden [Ü4 283a] istîfây-ı hazz ile Erzurum Eyâleti'ne tâlib ve niyâz u iltimâsı karîn-i müsâʿafe-i Şehriyâr-ı sütûde-menâkıb olmağla, işbu şehr-i Rebîʿulevvel'in yirmi ikinci günü eyâlet-i mezkûre ile müşârun ileyh nâyil-i ecell-i meʾârib olup, münhall olan Anadolu Eyâleti ile İznikmid Sancağı'na ber-vech-i arpalık mutasarrıf olan Vezîr es-Seyyid ʿAbdurrahmân Paşa karîn-i ferhat ü istibşâr ve İznikmid Sancağı'yla o havâlî umûruna vukūf-ı tâmmı olan Hüseyin Paşa Kethudâsı Kapucu-başı Ahmed Ağa hâyiz-i rehîne-i mesârr oldu.