Müşârun ileyh İstanbul sükkânından Zaʿîm ʿAli Ağa'nın sulbünden yüz altmış üç Safer'inde zuhûr edüp, fark-ı şimâl ü yemîn ve temyîz-i gass ü semîn eyledikde, Haremeyn Muhâsebesi Kalemi'ne müdâvemet ve meşk-ı şîve-i kitâbet eder iken, münâsebet-i civâriyyeti olan ağababası Hacı Mustafa Ağa'nın diraht-ı zâbil-i ikbâli muhazzar ve Sâhib-i tercemenin şecere-i âmâlini Mühürdârlık ve Kitâbet hidmetleriyle bâr-âver edüp, Vezâret'inde maʿan ʿazîmet ve Burusa'da bir müddet ikāmet etmişidi. Baʿde-bürhetin mine'z-zemân Âsitâne'ye ʿavdet ve Defterdâr Mektûbçusu Kalemi'ne mülâzemet eyleyerek, Defterdâr-ı vakte Kîsedâr ve bin yüz doksan senesi Hâslar Mukātaʿacılığı Pâyesi'yle necm-i gîsû-dâr-ı emeli tâb-dâr olmuşidi. İki yüz iki târîhinde Târîhcilik ile manzûr ve iki yüz üç senesinde Defterdâr Mektûbçuluğu'na ilhâkan Mâliyye Tezkireciliği ile mesrûr olup, iki yüz beş Safer'inde Ordu-yı hümâyûn'da Şıkk-ı Evvel Defterdârlığı rütbe-i celîlesine mevsûl ve iki yüz yedide maʿzûl ve sekiz senesi tevcîhâtında Baş-muhâsebe mansıbı ile tebcîl ve sâl-i mezkûr Cumâdelûlâ'sında Rûznâmçe-i Evvel'e tahvîl olunup, iki yüz on senesi evâsıtında Sadâret-i ʿuzmâ Kethudâlığı'yla nâyil-i kusvây-ı merâtib-i ricâl ve bir müddetden sonra o hidmet-i refîʿadan latma-hûr-ı infisâl olmuşidi. İki yüz on üç [V 121a] tevcîhâtında Emîn-i Defter-i Hâkānî ve sâl-i mezbûr [Ü4 262a] Zilkaʿde'sinin on birinci günü Rikâb Defterdarlığı'yla pânihâde-i süllem-i kâm-rânî olup, on dört senesi tevcîhâtında Tersâne-i ʿâmire'ye Emîn, baʿdehû Mısır Defterdarlığı'yla nâyil-i ʿizz ü temkîn olup, hıdmet-i mezkûre müsâʿade-i vakt ü hâl ile müşârun ileyhe bâʿis-i tahsîl-i nefʿ ü sûd ve bu sebeble kîse-i iktidârı mâl-â-mâl-i nukūd olup, edây-ı menâsik-i hacca râgıb ve Cidde mansıbına bâ-Rütbe-i Vezâret tâlib olup, mes'ûlü karîn-i müsâʿade-i Hâkān-ı zemân ve iki yüz on yedi Receb'inde Habeş Eyâleti ve Cidde Sancağı tarafına tevcîh ü ihsân ve iki yüz on sekiz târîhinde terk-i kâr ü bâr-ı dünyâ ve râyet-keş-i semt-i ʿukbâ oldu. Müşârun ileyh umûrunda müseyyeb ve idâre-i dâyiresinde inʿidâm-ı meleke-i tasarruf ile dâyimâ zahmet-keş ü muʿazzeb olduğu, zebân-zed-i erbâb-ı rüteb ise dahi, me'mûr olduğu hidemât-ı devletde sıdk u istikāmeti mücerreb olup, hande-rûy u minʿâm ve bezl ü infâk ile mahbûb-ı kulûb-ı hâss u ʿâmm olduğundan fazla, ʿâmiyâne sebük-kelâma kudreti ve cânib-i meʿârife meyl ü mahabbeti zâhir idi. Vehhâbîler'in Cidde Benderi'ni hasr u tazyîflerinde izhâr-ı mâye-i celâdet ve top u tüfeng ile emr-i müdâfaʿada ibrâz-ı me'ser-i metânet ve ʿale'l-husûs mer'ûbu'l-kulûb olan tüccâr ve sûdâ-gerâna kuvvetü'z-zahr-ı tesliyet olması, hayâtında zâtına îcâb-ı ʿizz ü şân eylediği gibi, kilîd-i Mekke-i mükerreme olan Cidde'yi eyâdî-yi bîgâneye giriftâr etmamek ʿamel-i sâlihi, âhiretde kendüye sebeb-i ʿafv ü gufrân olacağı me'mûl-i erbâb-ı îkāndır. [V 121b]