"Sarıgöllü Ali" nâm şakī, mukaddemâ Pâsbân-zâde'nin benâm bölük-başılarından olup, müşârun ileyh ʿafv olundukda, maktûl Gürcü ʿOsmân Paşa dâyiresine inzımâm ile Kütahya'ya maʿan vürûd edüp, Erzurum tevcîhinde müşârun ileyhden iftirâk ve Rumeli tarafına murûr [Ü4 251a] eyleyeceği haberi kâr-fermâyân-ı devlet tarafından istirâk olunup, o esnâda dağlu eşkıyâsı dahi Tekfûrdağı havâlîsinde tehaşşüd edüp, merkūm şâyed o fırka-i bâgıyeye iltihâk ile cemʿiyyetlerini teksîr eder mülâhazası, zihn-i hazret-i Sadâret-penâhî'de cây-gîr olup, bahşiş ü ʿulûfeleri cânib-i mîrîden verilerek, Devlet me'mûrlarıyla merkūm dahi dağlu üzerine teslît ve me'mûrlar ʿavdetinde merkūm boşda kalmamak içün Selânik Mutasarrıfı Vezîr ʿOsmân Paşa dâyiresine tahlît olunmuşidi. Rumeli Vâlîsi'nin talîʿa-i askeri Edirne'ye tekarrüb etdiğinden, Selânik muhâfızının maslahatı kalmayup, me'mûr olduğu mahalle ʿazîmet ve yine şakī-yi merkūm boşda kalup, izhâr-ı habâset eyleyeceği tevehhümüyle, Rumeli Vâlîsi tarafından me'mûr Süleymân Paşa'ya Sadr-ı müşterî-tedbîr cânibinden hufyeten mektûb tahrîr ve şakī-yi merkūmu dâyiresine isticlâb ile bir takrîb iʿdâmına ikdâm eylemesi tastîr olunmuşidi. Paşa-yı mûmâ ileyh Edirne'ye geldikde, merkūmu istishâb ve fursatını îkāʿ ile harmen-i ʿömrünü sûhte-i tîğ-i âteş-tâb edüp, ser-i nuhûset-eseri galtîde-i meydân-ı züll ü hevân ve Devlet-i ʿaliyye havenesinin biri fazl-ı Hakk ve hüsn-i tedbîr-i Vekîl-i mutlak ile fürû-nühüfte-i hufra-i noksân oldu.