Müşârun ileyh elli târîhinde pederi Mora Vâlîsi iken tevellüd [Ü4 250b] ve Murtazâ Efendi Meşîhati'nde Hâric Rütbesi'ne tevessüd edüp, devr-i merâtib-i muʿtâde ile doksan birde Kudüs Kazâsı ile süllem-i ʿizz ü rifʿate pâ-nihâde ve doksan dokuzda Burusa Mevleviyyeti ile teşrîf ve iki-üç sene murûrunda hasbe't-tarîk Haremeyn teklîf olundukda, baʿzı aʿzâr îrâdıyla ʿazîmetden dâmen-keş ve bu sebeble Bilâd-ı Erbaʿa Rütbesi'nde tevkīf olunarak, hâlî müşevveş olup, cülûs-ı hümâyûn esnâsında hemşîresi Zâhide Sultân şefâʿatiyle Medîne-i münevvere Rütbesi'ni ihrâz ve iki yüz dokuz senesi Rebîʿinde İstanbul Pâyesi'yle kesb-i tehayyüz ü imtiyâz, on beş senesi Receb'inde Anadolu Pâyesi'yle tahsîl-i vâye ve on yedi Muharrem'inde bi'l-fi'l Anadolu Sadâreti'yle tahkīk-ı pâye edüp, târîh-ı mezkûrda terk-i ihtilât-ı ebnây-ı zemân ve ʿâzim-i mahalle-i hâmûşân oldu. Müşârun ileyh ümmî vü sâde ve leyl ü nehâr celb-i havâdise dil-dâde olup, isticlâb-ı ahbâr içün muvazzaf âdemleri olup, her şeb o makūle cevâsîs-i ahbâr bezm-i cemʿine şemʿ olarak istirâk etdikleri havâdisi baʿzan sahîh ve baʿzan kizb-i sarîh olarak takrîr birle edây-ı hidmet ve merhûmun dünyâda ancak bu keyfiyyetle lezzet-yâb-ı inbisât olduğu resîde-i derece-i sıhhatdir; tecâvezallâhu ʿan seyyiʾâtihî.