Lîmân Re'îsi İnce Mehmed Bey, Tersâne-i ʿâmire'de kesb-i teʿayyün ü iştihâr ve erâzil beyninde sâhib-i kadr ü iʿtibâr olduğundan başka, öteden berü me'lûf-ı teʿayyün ü istibdâd ve mâyil-i tavr-ı tahrîk ü ifsâd olduğundan gayri, Kapudâne'nin Rütbe-i Vezâret'e neyl ü vusûlü, mûmâ ileyhe sebeb-i hased ü tezâgun ve ʿillet-i akvây-ı hıkd u teşâhun olup, bu hâl ile Tersâne'de ʿadem-i bekāsı enseb ve o dâyireden bir vesîle ile infikâkı müstasveb görüldüyse dahi, nîk ü bed sebkat eden hidmetine cezâ revâ olduğuna binâ'en, evâsıt-ı Şevvâlü'l-mükerremde mûmâ ileyhe Kapucu-başılık ihsân ve Tersâne'den Âsitâne'ye nakli bâbında lisânen emr ü fermân olundu. Kalyonlar Baş-halîfesi Saʿdullah Efendi baʿzı evzâʿ ile Tersâne halkını tekdîr ve rızâya mugāyir tavr u hareketi, evliyây-ı umûru dil-gîr eylediğine binâ'en, târîh-i mezkûrda Burusa'ya nefy ile tagyîr ü te'dîb ve ʿale'l-fevr ıtlâk ile tatyîb olundu.