Mısr-ı Kāhire müceddeden Rütbe-i Vezâret'le kadri ʿâlî olan ʿAli Paşa'ya tevcîh olunduğuna binâʾen, Vâlî-yi sâbık Vezîr Husrev Paşa'nın cânib-i Rûm'a ihrâcı ve bir mansıb ile def-i zarûret ü ihtiyâcı lâzım geldiğine binâʾen, Selânik Sancağı, ber-vech-i arpalık tarafına tevcîh olunup, Gönye Sancağı ve Fâş muhâfazası dahi Vezîr Tayyâr Mahmûd Paşa'nın mansıbı olan Trabzon Eyâleti'ne zamm u ilhâk ile kadri efzûn ve Karaman Eyâleti ile ber-vech-i Mâlikâne ʿAlâʾiyye Sancağı'na mutasarrıf Mîr-i mîrân'dan Seyyid ʿAbdurrahmân Paşa memnûn oldu. Husrev Paşa'nın Dimyât'da giriftâr olduğu haberi intişâr buldukda, Selânik Sancağı, Bender muhâfazası şartıyla sâbıkā Karaman Vâlîsi Vezîr Seyyid ʿAbdurrahmân Paşa'ya tevcîh olunup, bu'd-ı mesâfe sebebi ile dâmen-gîr-i ʿafv-ı Sadru's-sudûr ve İznikmid ve Sultân-önü sancakları ile vâreste-i sefer-i dûra-dûr olup, sâbıkā İznikmid Mutasarrıfı olup, [Ü4 210a – V 81a] dağlı maslahatına mebnî bundan akdem Çorlu ve Edirne etrafına taʿyîn olunan Vezîr ʿOsmân Paşa'ya Bender Kalʿası muhâfazası şartıyla Selânik ve Kavala sancakları tevcîh olundu.