Şehr-i mezkûrda Barmak-kapu pîşgâhında vâkiʿ şerbetci dükkânından âteş-i serkeş mültehib ve kâffe-i nâs bu musîbet sebebi ile muztarib olup, Peştemâlci Hânı ve Yol-geçen ve Kerpiç ve Kadı hânları ve otuz kadar dükkân sûzân [Ü4 209b – V 80b] olup, Hakk'ın fazl u ʿinâyeti ve itfâya me'mûrların saʿy ü gayretiyle Çarşu'ya sirâyet etmeyüp, ehl-i sûk, zemzeme-i şükr ü sipâsı resîde-i eyvân-ı ʿayyûk eylediler. Ve yine şehr-i mezkûrun yirmi dokuzuncu Çehârşenbih gicesi sâʿat altıda Aydınoğlu Tekyesi kurbünde vâkiʿ Mîrî Dellâlı Hâfız'ın hânesinden âteş zuhûr edüp, bir kolu Bâb-ı ʿâlî civârına ve bir kolu Hâce Paşa Kolluğu'na müntehî olup, tahmînen yüz hâne muhterik u münʿadim ve otuz kadar hâne münhedim olup, lutf-i Hakk ile muntafî ve kulûb-ı nâsdan havf-ı sirâyet müntefî oldu.