Bukʿateyn-i mübareketeyn kazâlarının vakt-i tevcîhleri hulûl eylediğine binâʾen, Mekke-i mükerreme Kazâsı, bin iki yüz on dokuz senesi Muharrem'i gurresinden zabt ve rütbesi târîh-i tevcîhinden muʿteber olmak üzere sâbıkā Burusa Kadısı Kütahyalı Ömer Efendi'ye ve Medîne-i münevvere Kazâsı, vech-i meşrûh üzere sâbıkā Mısır Kadısı Hamîdî el-Hâc Mustafa Efendi'ye tevcîh olunup, Burusa'dan munfasıl [V 78b] Mehmed Mekkî [Ü4 207b] Efendi, ʿillet-i pîriyle münkatıʿu'l-ʿamel ve derd-i insıbâb ile şakk-ı yemîni muʿattal olup, Edirne'den maʿzûl Ağa İmâmı-zâde Ahmed ʿÂrif Efendi dahi kühen-sâl ve medyûn u muztaribü'l-hâl olup, Mekkî Efendi'ye Rebîʿulâhır'ın üçüncü gününden ve Ahmed ʿÂrif Efendi'ye on birinden pâye telhîs olundukda, müsâʿade-i hümâyûn erzânî ve karîha-i sabîhadan mahdûm-ı cenâb-ı Şeyhulislâmî, sâbıkā Galata Kadısı Mehmed Sâlih Efendi'ye dahi Rebîʿulâhır'ın on dokuzuncu târîhiyle Mekke Pâyesi verilüp, o mahdûm-ı necâbet-lüzûm dahi mazhar-ı lutf ü ʿinâyet-i hazret-i Cihân-bânî oldu. Mahrec iʿtibârıyla Erzurum Kazâsı'nı zabt eden es-Seyyid Mehmed Kudsî Efendi, ehl-i ʿilm ü meʿârif ve bâ-husûs Mısır cenglerinde mübtelây-ı mehâlik ü mehâvif olup, sebkat eden hidmeti bir nevʿ mükâfâtı müstelzim olduğuna binâʿen, Rebîʿulevvel'in on beşinci gününden Edirne Pâyesi'yle tatrîb ve kenâre-i nüsha-i emeli, mâ'u'z-zeheb-i mekârim-i evliyây-ı niʿamâ ile tezhîb olundu.