Ser-kāfile-i Vehhâbiyân olan İbn-i Suʿûd bu hılâlde Tâyif'e doğru sevk-ı cünûd-i haybet-mev'ûd edüp, etrafında mütemekkin Aʿrâb-ı [V 58a] bevâdîyi tavʿan ev revʿan isticlâb ve birkaç defʿa Tâyife hücûm eyledikde, derûnunda mütehassın olanlar emr-i müdâfaʿada bezl-i cehd ü tâb edüp, ancak kavm-i mezkûra cevâb veremeyeceklerini Şerîf-i Mekke cenâblarına tahrîr ve imdâd u iʿâne eylemesini tastîr etmişler idi. Müşârun ileyh dahi kemer-bend-i inkıyâd u itâʿati olan asker ile bi'n-nefs mahall-i mezkûra șitâb u sürʿat ve iki-üç defʿa bugāt-ı mezkûre ile tarh-ı kâr-zâr-ı müşâceret etdiyse dahi, yevmen-fe-yevmen cemʿiyyetlerine kesret ve Şerîf-i Mekke tarafına zaʿf u kıllet ʿârız olduğundan, muhâfaza vu mukāvemete muktedir olmayup, muntasıf-ı Şevvâl'de Vehhâbîler Tâyif'e duhûl ve müşârun ileyh dahi Mekke-i mükerreme'ye ʿavd u kufûl ve hafr-i meteris ile meşgûl olduğunu Mîrü'l-Hâcc olan Vezîr ʿAbdullah Paşa'ya tahrîr eylediğinden başka, tâyife-i makhûrenin bir mikdârı Medîne-i münevvere üzerine gelüp, hâric-i şehri nehb ü gāret ve seyyidü'ş-şühedâ hazret-i Hamza bin ʿAbdülmuttalib'in kubbe-i darîhini hedm ve mezâr-ı şerîfleri pûşîdesini [185a] taktîʿ u tefrîk ve derûnunda olan mesâhif-i şerîfeyi temzîk eylediklerinden gayri, Medîne-i münevvere'yi hasr u tazyîk eyledikleri hâlde Mîrü'l-Hâcc Paşa'nın tekarrübü haberi intişâr bulduğundan, hüccâc-ı hidâyet-minhâcın reh-i râstlarında vâkiʿ “Müdric” ve “Avâlî” nâm mahalle çekildikleri istihbâr ve âmâde-i harb ü kâr-zâr olmuşlar idi. Müşârun ileyh hüccâcın mukāvemete kudret-yâb olanlarını ifrâz ve cemʿiyyetine ilhâk ve fi'l-hâl tertîb-i talîʿa ve yemin-i visâk (وساق) ile bi'l-ittifâk bugāt-ı mezkûre üzerine hecme-endâz-ı salâbet ve hamle-i ûlâda o fırka-i [V 58b] bâgıyeyi pây-endâz-ı huyûl-ı mehâbet ederek, bir mikdârı hâke galtân ve bakıyyesi benât-ı naʿş gibi müteferrik ü perîşân olup, mukārenet-i feth u zafer ile Mekke-i mükerreme'ye hudâ-hân, ʿazîmet olduklarını Mîrü'l-Hâcc Paşa ve aʿyân-ı hâcc eğerçi tahrîr eylediler. Ancak Medîne-i münevvere sükkânının fîmâ-baʿd şiddet-i muhâsaraya musâberetleri müstahîl ve zahîre ve asker ile imdâd u iʿâneye eşedd-i ihtiyâcları vâreste-i delîl olduğunu şâmil, bi'l-ittifâk bârgâh-ı Şehriyâr-ı âfâk'a itâre-i evrâk eylediler. Mîrü'l-Hâcc Paşa Havâric zümresine gālib olduysa dahi, o taraflarda olan kuvveti yirmi güne mütenâhî olup, baʿde'l-ʿavd Hâricîler o taraflarda envâʿ-ı fesâd u teʿaddî ile Mekke-i mükerreme ve Medîne-i münevvere'ye duhûl u gārete tesaddî edecekleri evzâʿ u etvârlarından istidlâl ve meʾmûrların bir ân akdem cânib-i Hicâz'a vusûlleri emri istiʿcâl olunup, Mısır Vâlîsi Vezîr Husrev Paşa'ya bu keyfiyyet tahrîr u işâret ve Medîne-i münevvere Muhâfızı Vezîr Ahmed Paşa henûz yerinden hareket [Ü4 185b] etmemiş ise bir lahza tevakkufa ruhsat verilmeyerek savb-ı maksûda îsâl ve tertîbâtdan girü kalmışı var ise, ʿalâ-cenâhi'l-istiʿcâl irsâli ve pey-der-pey meʾmûrlar ile muhâbere eyleyerek, cânib-i Hicâz'ın keyd-i Hâvâric'den selâmeti emrine kemâ-yenbagī ihtimâm ü dikkat eylemesi, cânib-i Sadâret-penâhî'den müʾekked ü müşedded tahrîr ve Kapudân-ı deryâ Vezîr Hüseyin Paşa tarafından dahi bu teʾkîdât tervîc olunup, çifte Tatar berren Mısır cânibine tesyîr olundu.