Anadolu Pâyesi'yle mükerrem olan İbrâhîm Beyefendi, mübtelâ olduğu ʿilletden tahlîs-ı girîbân edemeyüp, evâsıt-ı Zilhiccetü'ş-şerîfede dâʿî-yi ecele lebbeyk-zen-i icâbet ve hırâmende-i çemen-zâr-ı dâr-ı mağfiret oldu. Müşârun ileyh evâsıt-ı Saltanat-ı hazret-i Sultân Mustafa Hânî'de pederleri es-Seyyid Mustafa Ağa, Mîrâhûr-ı Evvel iken bâ-İbtidâ-i Hâric, Fazliyye Medresesi'yle hâyiz-i nuhustîn-i pâye-i medâric olup, pederleri vefâtından sonra Mustafa Paşa-zâdelik ile kesb-i iştihâr ve giderek Haremeyn Müfettişliği ile kulûb-ı hussâdı dâğ-dâr etmişidi. Mukārenet-i tevfik ile tayy-i ʿakabât-ı tarîk ve iki yüz târîhinde Havâss-ı refîʿa Mevleviyyeti ile necm-i ʿizzeti berîk ve gusn-ı emeli verîk olup, iki yüz altıda Mısr-ı Kāhire hükûmetiyle isʿâd ve ʿamm-zâdeleri Vezîr ʿİzzet Mehmed Paşa [Ü4 182b] Mısır Vâlîsi bulunup, Sâhib-i terceme hacc-ı Beytullâhü'l-harâm kasdında olduğunu îrâd edüp, iʿânet-i müşârun ileyh ile müctâz-ı râh-ı Hicâz ve iskāt-ı ferîza-i hacc ile ser-efrâz olup, iki yüz sekiz senesinde müşârun ileyhin şefâʿati ve Şeyhulislâm-ı vakt bulunan Dürrî-zâde merhûmun dûra-dûr karâbeti münâsebeti ile Mekke-i mükerreme Pâyesi'ni ihrâz etmiş idi. İki yüz on târîhinde İstanbul Pâyesi'yle hâtırı mecbûr ve iki yüz on üçde Anadolu Pâyesi'yle mesrûr olup, on yedi Muharrem'inde bi'l-fiʿl Anadolu Sadâreti tarafına teklîf ve ʿadem-i kabûl ü istiʿfâ ile debdebe-i ʿiffetini tazʿîf edüp, târîh-i mezkûrda fevt ve zâyik-ı sekret-i mevt oldu. Müşârun ileyh ʿafîf ve perhîz-kâr, mutasallib ü dîndâr, hulk-ı cemîl ile mevsûf ve hüsn-i ülfet ile meʾlûf olup, bin yüz elli târîhinde tevellüd etdiğine nazaran siniyy-i ʿömrü altmış yedi seneye bâliğ, umûr-ı dünyeviyyeden fârigu'l-bâl bir zât-ı melekiyyü'l-hısâl idi.