İşbu Şevvâlü'l-mükerremin beşinci Sebt günü resm-i Devlet-i ebed-müddet üzere tevcîhât vâkiʿ olup, ricâl-i bâb bi-esrihim ibkā ve yalnız Çavuş-başılık ile sâbıkā Kethudây-ı hazret-i Sadr-ı âlî ʿOsmân Efendi'nin sebze-zâr-ı emeli irvâ olunup, defterdârân-ı emvâl-i hazret-i Şehinşâhî, ʿizzet-i ibkā vü takrîr ile mübâhî ve Nişancılık hıdmetiyle sâbıkā Rikâb Defterdârı Feyzullah Efendi tahkīk-ı tarîk ve Defter Emâneti ile Râsih Mustafa Efendi'nin necm-i kevkeb-i ikbâli rahşende vü berîk olup, Rûznâmçe-i Evvel mansıbı Firdevsî Efendi'ye tahsîs olunup, Baş-muhasebe mansıbını Françe'de bir müddet sefâret tarîkıyla ikāmet ve ba'de's-sulh Âsitâne'ye ʿavdet eden Moravî ʿAli Efendi tahlîs eyledi. Şehir ve Darb-hâne emânetleri ibkāsıyla mutasarrıflarının risâle-i ikbâlleri takrîz ve Tersâne Emâneti, Çelebi Reşîd Mustafa Efendi'ye ve Matbah Emâneti, Sâlih Paşa-zâde Hüseyin Bey'e ve Arpa Emâneti, ʿAzmî Ahmed Efendi'ye tefvîz olunup, Barut-hâne Nezâreti, Râgıb Efendi'ye ibkā ve Anadolu Muhâsebeciliği [Ü4 172a] Çukadar Ağalığı'ndan muhrec Hasan Efendi'ye ve Süvârî Mukābeleciliği ile Teşrîfâtî-yi esbak Hacı Mustafa Efendi kâm-revâ kılınup, Kalyonlar Kâtibi Tâhir Ağa-zâde Emîn Efendi, Cebe-hâne binâsına me'mûr olmak hasebiyle bi-tarîkı'n-nakl Haremeyn Muhâsebeciliği ile tatyîb ve Yeniçeri Kitâbeti ile Yazıcı-yı esbak ʿOsmân Efendi tatrîb [V 46a] olundu. Sipâh Kitâbeti, Lala Mehmed Efendi'ye, Silahdâr Kitâbeti, ʿAffân Bey'e, Cizye Muhâsebesi, ʿismetlü Hadîce Sultân Kethudâsı Hüseyin Efendi'ye, Mevkūfât, sâbıkā Küçük Tezkireci İbrâhîm ʿAfîf Efendi'ye, Masraf-ı Şehriyârî Kitâbeti, İspir Ağa Mühürdârı Emîn Efendi'ye, Mâliyye Tezkireciliği, Sâhib Efendi'ye, Kalyonlar Kitâbeti, Zindân Kâtibi'ne, Küçük Rûznâme, Halîl Paşa Vekîlharcı Seyyid Mehmed Efendi'ye, Piyâde Mukābeleciliği, Üsküdar'da olan Ebniye-i Mîrî Emîni Hüseyin Efendi'ye, Küçük Evkāf, sâbıkā Re'îs Kîsedârı Mustafa Efendi'ye, Haremeyn Mukātaʿacılığı, Kāyim-makām ʿAbdullah Paşa Hazînedârı ʿAbdülhayy Efendi'ye, Cebeciler Kitâbeti, Nûrî Efendi'ye tevcîh ü ihsân ve sâyir menâsıb dahi ber-vech-i münâsib erbâbına ihâle olunup, ʿadem-i ittisâʿ sebebi ile mansıbdan mahrûm olanlar dahi ʿatâyây-ı Şâhâne ile mesrûr ü ferhân kılındılar. Yevm-i mezkûrda vüzerây-ı ʿizâm hazerâtının mutasarrıf oldukları menâsıbın ekseri ibkā vü takrîr olunup, ancak Erzurum Eyâleti, Sivas Vâlîsi Vezîr ʿAlâ'eddîn Paşa'ya ve Sivas, selefi Vezîr Seyyid ʿAbdurrahmân Paşa'ya ve Hanya muhâfazası, Vezîr Seyyid Mûsâ Paşa'ya ve Adana Eyâleti, Filibeli Çelebi Seyyid ʿÖmer Paşa'ya ve Selânik Sancağı, Vezâret'i ibkāsıyla [Ü4 172b] Vânî Seyyid Mehmed Paşa'ya ve Koca-ili Sancağı, Cebeci-başılık'dan muhrec Vezîr ʿOsmân Paşa'ya tevcîh olundu.