Bundan akdem Bağdâd ve mülhakātına Vâlî ve yirmi dört sene kadar kutr-ı 'Irâk'da merciʻ-i esâfil ü eʻâlî olan Vezîr Süleymân Paşa, terk-i dâr-ı fenâ ve ʻazm-i sûy-i bekā edüp, Kethudâ ve dâmâdı Mîr-i mîrân-ı kirâmdan 'Ali Paşa ittifâk-ı vücûh-ı serhadd ile Kāyim-makām nasb olunup, vücûd-ı kābiliyyet-i istihkāk ile Rütbe-i Vezâret'e sezâ olduğu dahi o tarafdan vürûd eden ʻarz u mahzarda ʻalâ-tarîkı'l-istirhâm îmâ olunmuşidi. Eyâlet-i mezkûre Paşa-yı mûmâ ileyhe hasr-ı ʻaklî ile münhasır ve akrân u pâdâşlarına tefevvuk u rüchâniyyeti zâhir olduğundan gayri, semt-i hılâfında olan fitne-cûyân-ı memleketi tedmîr ü ifnâ ve 'aşâyir ü kabâyili zabt u rabt [Ü4 158b – V 29b] ile te'mîn-i etrâf u enhâ etdiği, her ne kadar rütbe-i sıhhate resîde olduysa dahi, kesret-i mâl ü dînâr ve vefret-i tuhaf u yâdigâr ile iştihâr bulan müteveffâ Süleymân Paşa'nın bedel-i muhallefâtına ve Vezâret-i muʻayyenâtına dâ'ir tarafından sadra şifâ verecek tahrîrât vârid olmayup, ikāz ü tezkîr zımnında Sadr-ı müşterî-tedbîr tarafından üslûb-ı hakîmâne üzere Paşa-yı mûmâ ileyhe kāyime tahrîr ve haber zuhûruna dek emr-i Vezâret te'hîr olunmuşidi. Paşa-yı mûmâ ileyh her hâlde rızây-ı cûy-ı devlet ve uğur-ı Pâdişâhî'de mâl değil cân fedâ edeceğini işâret eylediğinden başka, bedel-i muhallefât olarak yedi bin beş yüz kîse cânib-i mîrîye ve bin kîse ʻivaz-ı Vezâret ve beş yüz kîse ricâl-i devlete tevzîʻ olunmak sûretinde gayr ez-ʻavâyidât cemʻan dokuz bin kîse hıdmet ile îfây-ı lâzime-i ʻubûdiyyet ve bir mikdârını pîşîn irsâl ve kusûrunu ber-vech-i taksît edâ zımnında istimhâl eylediğini Sadr-ı Felâtûn-menkabet ʻarz-ı Südde-i gerdûn-rifʻat buyurduklarında, izn ü ruhsat-ı hazret-i Cihân-bânî tesvîg ü erzânî kılınup, işbu Recebü'l-ferdin on dördüncü Çehârşenbih günü mûmâ ileyhe gāyet-i rütbet-i beşeriyye olan câh-ı vâlâ-yı Vezâret'le zikr olunan eyâlât tevcîh ü ihsân ve ân-be-ân müterabbis u nigerân olduğu matlab-ı ʻazîzü'l-menâlin husûlüyle mesrûr u şâdân kılındı. Müşârun ileyhin o derecelerde Devlet-i ʿaliyye'ye hidmet edeceği mevhûm ve cüz'î şey' teklîfi ile matlabını tahsîl esbâbına teşebbüs edeceği emr-i meczûm iken, Sadrıaʿzam-ı sütûde-şiyem hazretlerinin tedbîr-i dil-pezîr ve bast u temhîd buyurdukları [Ü4 159a] mukaddimât-ı [V 30a] maʿkūlenin te'sîriyle Vezîr-i müşârun ileyh ifrâğ-ı cehd ü tâkat ve bâliğan-mâ-belağ Devlet-i ʿaliyye'ye hidmet ile pend u nasîhat, hazret-i Sadru's-sudûr'u mengûş-ı hûş u ruʿyet eyledi.