Cevdet ü iʿtidâl-i hevâ ve inkişâf-ı etrâf ile şöhret-nümâ olan Çırağan Yalısı, bundan akdem ʿısmetlü Beyhân Sultân hazretleri tarafından bedel-i maʿlûm ile taraf-ı müstecmiʿü'ş-şeref-i hazret-i Cihân-dârî'ye terk olunup, eyyâm-ı sayfda muhtasar dâʾire ile baʿzan ikāmete sezâ görülmüşidi. Sâhil-hâne-i mezkûrede nefs-i nefîs-i hümâyûn içün Mâbeyn Dâʾiresi bulunmadığından, sarrâf yedinde müstagill bulunan merhûm Rodoslu'nun yalısı, istiglâlden fekk ve semeni edâ ve yetîmlerine dahi kemâl-i merhamet-i Şâhâne'den yirmi sekiz kîse akçaya bir hâne iştirâ olunup, Mâbeyn misillü gâhîce der-i nâ-yâb-ı vücûd-ı Husrevâne'lerine sadef ve şems-i tâbân-ı [Ü4 157b – V 28b] zât-ı Hıdîvâne'lerine beytü'ş-şeref olur idi. Mahall- i mezkûr zemân mürûruyla müşrif-i harâb ve zîk-ı mecâl ve ʻadem-i ittisâʿından nâşî, müceddeden binâ vü inşâsı hâtır-güzâr-ı Şehriyâr-ı İskender-cenâb olmuş iken, gāyile-i sefer-i münticü'z-zafer bu emrin temşiyyetini bâz-dâşte-i vakt-i hazar edüp, fazl-ı Bârî ve yümn-i ikbâl-ı hazret-i Tâc-dâri'yle zikr olunan gavâyil mündefiʿ ü zâyil ve mahall-i mezkûrun binâsına meyl ve ikbâl-i Pâdişâh-ı deryâ-nevâl hâsıl olduğunu Sadrıaʿzam ve bedr-i efham hazretleri nûr-ı ferâsetle idrâk buyurup, gerek Çırağan ve gerek Rodoslu yalısının resm-i dil-keş ve tarh-ı nev-nakş ile müceddeden bünyâd olunmasını nakş-ı fu'âd ve eʿazz-i matlab u murâd edüp, Nem varsa fedâ dergehine ey Şeh-i Cem-câh / el-ʿAbdü ve mâ-yemlikühû kâne li-mevlâh makālesiyle ruhsat-hâh olduklarından gayri, resm-i matbûʿunu dahi ber-vech-i taʿzîm dergâh-ı Sâhib-i tâc u dîhîme ʿarz u takdîm etmişler idi. Çırağan Yalısı her ne kadar zâhirde zîbende vü cedîd ise dahi ʿan-asl götürü verildiğinden, baʿzı mahallinde eser-i vehn ü indirâs bedîd olup, maʿa-mâ-fîh serâpâ hedm ve binâsında ʿâriza-i isrâf ile vâfir meblağ itlâf olunacağı emr-i vâzıh ve mizâc-ı feyz-imtizâc-ı hazret-i Hılâfet-penâhî'ye muvâfık olmayan baʿzı mahalleri taʿmîr olunduğu takdîrde, maksûdun bizzât olan hey'et-i cedîde husûlü, mir'ât-ı suver-i maʿkūlât u mahsûsât olan zihn-i sâff-ı hazret-i Tâc-dârî'ye lâyıh olduğundan, taʿmîr ile iktifâ ve Rodoslu sâhil-hânesi hedm ve müstakillen Mâbeyn Dâyiresi binâ olunmak üzere taraf-ı hümâyûndan izn ü ruhsat iʿtâ [Ü4 158a – V 29a] olunmağla, işbu Recebü'l-ferdin beşinci yevm-i İsneyn Sadr-ı sütûde-menkabet kemâl-i hâhiş ü rağbet ile tebdîlen mahall-i mezkûra ʿazîmet ve ihtiyâr olunan sâʿat-i saʿd hulûlünde devâm-ı ʿömr ü şevket-i Husrevâne duʿâsına mübâşeret ile vazʿ-ı esâs ve iktizâ edenlere hilʿat-i fâhire ilbâs ve zebh-ı kurbân ve neşr-i ihsân kılındığından gayri, Çırağan Sâhil-hânesi'nin dahi ber-vech-i muharrer taʿmîrine teşmîr-i dâmen-i ikdâm ve bezl-i mevcûd ve ʿarz-ı bûd ve ne-bûd ile Sadr-ı vâlâ-makām, tahsîl-i rızây-ı Şehriyâr-ı enâm ve iktifây-ı âsâr-ı eslâf-ı kirâm eylediler.