Sadrıaʿzam Kethudâsı ʿOsmân Efendi'nin ʿazli karâr-gîr ve kudûm-i Sadâret-penâhî'ye dek bâz-beste-i girih-i te'hîr olmuşidi. Hubûbât Nâzırı olan Ahmed ʿAtıf Efendi fârık-ı miyân-ı nîk ü bed ve liyâkat-yâfte-i şümâr u ʿadd olaldan berü serâyir-i Devlet-i ʿaliyye'de müstahdem ve giderek meleke-i kitâbete tevassul ile te'lîf-i kelâm ve ifâde-i merâmda teferrüdü “Ke-nârin ʿalâ ʿalem” olup, birkaç sene mukaddem bi'l-istihkāk Rütbe-i Riyâset'e iʿtilâ ve lâzime-i hıdmetini bi'l-asâle ve baʿdehû bi'l-vekâle idârede irâ'e-i yed-i beyzâ edüp, nâ-gâh ʿaraz-ı maraz ile sakīm ve temâdî-yi vakt ile netîce-i umûr-ı Riyâset ʿakīm olup, âharının Riyâset'e takrîbini zarûret ilcâ ve tashîh-i mizâc edinceye dek duʿây-ı bekāy-ı ʿömr ü devlet-i Şâhâne'yi vird-i subh u mesâ etmişidi. Meded-kârî-yi şifâ-sâz-ı bî-enbâz ile rütbe-i sıhhati ihrâz ve on altı senesi tevcîhâtında Hubûbât Nezâreti'yle kesb-i tehayyüz ü imtiyâz edüp, Ordu-yi hümâyûn geldikde, Efendi-yi mûmâ ileyhin hafâyây-ı umûr-ı mülkiyyeye vukūfu ber-kemâl ve ahvâl-i düvel ve etvâr-ı milele ıttılâʿı vâreste-i kayd-ı istidlâl olduğuna binâ'en, Bâb-ı ʿâlî'ye takrîb ü tavsîl ile sâyirlerinin maslahatları tehvîn ü teshîl olunmak hâtır-güzâr-ı veliyy-i devlet ve işbu [V 10b] Rebîʿulâhır'ın altıncı yevm-i Hamîs Sadâret-i ʿuzmâ Kethudâlığı'yla neşve-dâr-ı rahîk-ı meserret olup, Çavuş-başı bulunan ʿÂrif Efendi'nin dahi baʿzı esbâb ile binây-ı rifʿatine vehn ü tezelzül târî ve yevm-i mezkûrda ʿazl ile gunûde-i pister-i gam-hârî olup, sâbıkā Sadrıaʿzam Kethudâsı Saʿdullah Efendi, Ser-çavuşân ve Şehr-emîni Seyyid Mehmed Efendi, Hubûbât Nezâreti'yle pâ-nihâde-i merkez-i ʿizz ü şân ve münhall olan [Ü4 139b] Şehr-emâneti ile Dervîş Efendi-zâde Mustafa Bey mesrûr u cezlân olup, sâbıkā Sadrıaʿzam Mektûbçusu Refîk Mustafa Efendi'nin fenn-i kitâbetde mümâreseti ve dest-yârî-yi ʿakl ü zekâ ile me'mûr olduğu hidmetde sadâkat ü istikāmeti, sebeb-i fürûzende-i necm-i rifʿati olup, yevm-i mezkûrda Mektûbçuluk hıdmetiyle Bâb-ı ʿâlî'ye celb ve selefi Hamîd Efendi'nin erâzî-yi Mısrıyye'de çekdiği mihen ü meşakkate nazaran hidmetden dûr ve kurb-i Âsafî'den mehcûr olması revâ görülmeyüp, İbrâhîm Efendi ʿazlinden Küçük Tezkireci nasb olundu.