Sadr-ı meʿâlî-semîr hazretlerinin Halebü'ş-şehbâ'ya şeref-endâz-ı iclâl oldukları, mukaddemâ nigâşte-i sahîfe-i tahrîr kılınmışidi. O havâlînin dahi lâzım gelen nizâmı ahsen vechile tensîk ve şevârid-i umûru mehmâ-emken mûcibât-ı [V 9a] vakt ü hâle tatbîk olunup, Kaʿbetü'l-ikbâl-i ashâb-ı hâcât u âmâl olan Dergâh-ı Pâdişâh-ı Sürûşî-hısâl'a rû-mâl içün Haleb'den fekk-i tınâb-ı ikāmet ü ârâm ve hılâl-i râhda istimâʿ-ı deʿâvî ve icrây-ı ahkâm ve îfây-ı lâzime-i nakz u ibrâm eyleyerek, “Maldepe” nâm merhaleye bi'l-yümni ve's-saʿâde pâ-nihâde oldukları, sâmiʿa-res-i Şehriyâr-ı ʿadâlet-ʿâde olmağla, muʿtâd üzere ʿavdetlerine Silahdâr Ağa taʿyîn olunup, mahall-i mezbûrda mülâkāt ve resm-i daʿvet edâ ve taraf-ı Âsafâne'den lâzime-i ikrâm u ihtirâm [Ü4 138a] fevka'l-merâm mü'eddâ vü mürʿâ ve haber-i semʿ ü tâʿat ile Ağa-yı müşârun ileyh ʿavdet etmişidi. Şehr-i Rebîʿulâhır'ın üçüncü İsneyn günü Maldepe'den harekete te'ehhüb ve Haydar-paşa'da taraf-ı vâzıhu'ş-şeref-i Cihândârî'den lutfen ve keremen tertîb olunan yemeklik mahalline tekarrüb buyurduklarında, semâhatlü Şeyhülislâm Efendi hazretleri otağdan yirmi hatve ilerüde râkiben istikbâl ve pîrâmen-i otağda kezâlik râkiben saff-beste-i selâm olan Nakībüleşrâf ve Anadolu Kadıʿaskeri ve İstanbul Kadısı ve ricâl-i devlet ve Ocağlu ve kapucu-başılar resm-i terhîb ü teʾehhülü icrâ ile kadd-hamîde-i ibtihâl oldular. Sadrıaʿzam ve bedr-i efham hazretleri Otak-ı süreyyâ-nitâk'a nüzûl buyurduklarında, erbâb-ı alay vâhiden-baʿde-vâhidin ʿalâ-ihtilâfi merâtibihim dâmenbûs-ı Âsafâne'leriyle müstesʿid ve çadırlarına râciʿ u ʿâyid oldukları hengâm, Hân-ı vesîʿü'l-nevâl-i Hâkānî'den otuz süfre ve her süfresi dörder beşer tabladan ʿibâret etʿime-i şehiyye ve nefâyis-i hûrdenî, zikr olunan zevâtın hıyâmına taksîm ve maʿiyyetlerinde olan hâcegân ve sâyir hademe-i devlet ile tenâvül [V 9b] ve duʿây-ı Şâhâne'yi güzârende-i zebân-ı taʿzîm eylediklerinden fazla, hademe ve sâyir maʿiyyet-i Âsafî ile vârid olan tavâyif-i askerîye mahall-be-mahall medd-i simât-ı niʿam ve itʿâm-ı ehass u eʿamm kılındı. Maslahat-ı taʿâm hıtâm buldukdan sonra alay tertîb olunup, çavuşân ve zuʿamâ ve ümenâya dek hâcegân-ı Dîvân-ı bülend-erkân ve Dergâh-ı âlî kapucu-başıları ve Sipâh ve Silahdâr ağaları ve Menâsıb-ı Sitte ricâli ve İstanbul Kadısı ve Sadr-ı Anadolu ve Nakībüleşrâf ve bunların ʿakībinde Kapudan Paşa [Ü4 138b] ve Kāyim-makām Paşa hazerâtı müretteben pîşgâh-ı Sadr-ı Âsaf-câh'da yürüyerek, misli nâ-yâb alay ile iskeleye karîb gelindikde, Sadr-ı müşârun ileyh hazretleri salât-ı zuhru edâ ve cenâb-ı Fetvâ-penâhi'yle sandala süvâr ve müşârun ileyhimâ hazerâtı kafâdâr olarak Beşiktaş'da hâk-i ʿatebe-i Şehinşâhî'ye çehre-sâ oldular. Emr-i kuʿûd ile teşerrüf ve teʾeddüben tevakkuf olunduysa dahi, tekerrür-i emr-i hümâyûn imtisâli îcâb ve kemâl-i teveccüh ve iltifât-ı Şâhâne, müşârun ileyh hazretlerini ihâta vü istîʿâb eylediğinden gayri, mukaddemâ ihzâr olunan hançer hakk-ı Âsafâne'lerinde istiklâl olunup, miyân-bend-i Mülûkâne ile kesb-i zîb ü behâ eden hançer-i girân-kıymet ile kadr ü iʿtibârları vâsıl-ı mihr-i cihân-ârâ kılındığı sâʿat semmûr kürk der-ber ve elmâs ile ârâste sorguç der-ser kılınup, müşârun ileyh hazretleri girye vü zârî ile bu kadar nevâziş ve lihâza-i kâm-kârîye şâyân olmadığını îrâd ve: “Güzel hidmet etdin ve Kapudan Paşa dahi güzel hıdmet eyledi” kelâm-ı dürrü'n-nizâmıyla tenşît ü isʿâd olunup, fi'l-hâl zemîn-bûs-ı zarâʿat ve Serây-ı Âsâfâne'lerine ʿavdet ve cenâb-ı Fetvâ-penâhî'yle ʿArz Odası'nda celse-i hafîfeden [V 10a] sonra resm-i ʿâdî îfâ ve seng-i rikâba dek teşyîʿ ʿakabinde Kapudan Paşa ve Kāyim-makām Paşa hazerâtına kürkler iksâ ve Dîvân yerine inüp, ʿumûm hilʿatleriyle erbâb-ı menâsıbı tatyîb ü tekrîm ve baʿdehû ʿâdet olunduğu vech üzere hey'et-i mütenekkire ile çıkup, kıyem ü esʿâr ve evzân u mikdâr umûrunu dahi takvîm ʿakabinde Serây-ı Âsâfâne'lerine ʿinân-rîz-i ricʿat ve zânû-zede-i visâde-i râhat oldular.